ക്രിക്കറ്റ് ആവേശത്തില് സ്വാതന്ത്ര്യദിനാഘോഷം: ഇന്ഡിപെന്ഡന്സ് കപ്പില് റൊഹാന് സിസിക്ക് മേധാവിത്വം
കൊയിലാണ്ടി: ഇന്ത്യയുടെ എണ്പതാം സ്വാതന്ത്ര്യദിനാഘോഷത്തിന്റെ ഭാഗമായി കോഴിക്കോട് ജില്ലയിലെ പ്രമുഖ ലെതര് ബോള് ക്രിക്കറ്റ് ടീമുകള് മാറ്റുരച്ച ‘ഇന്ഡിപെന്ഡന്സ് കപ്പ് ടെസ്റ്റ് മാച്ചില്’ ടീം റൊഹാന് സിസിക്ക് മികച്ച തുടക്കം. മുചുകുന്ന് കോളേജ് ഗ്രൗണ്ടില് നടന്ന ആവേശകരമായ മത്സരത്തില്, ഒന്നാം ഇന്നിങ്സ് പൂര്ത്തിയാകുമ്പോള് റൊഹാന് സിസി 48 റണ്സിന്റെ നിര്ണായക ലീഡ് സ്വന്തമാക്കി. ഡെര്ബിഷയര് പ്രസന്റ്സ് ആണ് പ്രത്യേക ടൂര്ണമെന്റ് സംഘടിപ്പിച്ചത്. അഖില് ദാസിന് തകര്പ്പന് അര്ധസെഞ്ചുറി വാശിയേറിയ പോരാട്ടത്തില് ടോസ് നേടിയ റൊഹാന് സിസി ബാറ്റിംഗ് തിരഞ്ഞെടുക്കുകയായിരുന്നു. മികച്ച ബാറ്റിംഗ് പ്രകടനത്തോടെ അവര് ആദ്യ ഇന്നിങ്സില് 216 റണ്സ് അടിച്ചെടുത്തു.
ആക്രമണാത്മക ബാറ്റിങ്ങിനൊപ്പം മനോഹരമായ പ്രതിരോധവും കാഴ്ചവെച്ച് 74 റണ്സ് നേടിയ അഖില് ദാസാണ് റൊഹാന് സിസിയുടെ ടോപ് സ്കോറര്. അഖിലിന്റെ ഇന്നിങ്സ് മത്സരത്തിലെ പ്രധാന ആകര്ഷണമായി. മറ്റു ബാറ്റര്മാരായ റിസ്വാന് (39), അരുണ് ഭരത് (34), യു.സി (17), ഹംസ (15*), ഫിറോസ് (14) എന്നിവരും ടീം സ്കോറിലേക്ക് മികച്ച സംഭാവന നല്കി.തകര്ച്ചയില് നിന്ന് കരകയറി ഡെര്ബിഷയര് മറുപടി ബാറ്റിംഗിന് ഇറങ്ങിയ ഡെര്ബിഷയര് സിസിക്ക് (Team Derbyshire CC) തുടക്കത്തില് റൊഹാന് സിസിയുടെ മാരക ബൗളിങ്ങിന് മുന്നില് അടിപതറി. യു.സി റിയാസ്, അഷറഫ് എന്നിവരുടെ വിനാശകരമായ പേസ് ബൗളിങ് ആക്രമണത്തില് ഡെര്ബിഷയര് ഒരു ഘട്ടത്തില് 37 റണ്സിന് 7 വിക്കറ്റ് എന്ന നിലയില് തകര്ന്നു.
മധ്യനിരയില് ഒത്തുചേര്ന്ന ക്യാപ്റ്റന് സര്ഫ്രാസും പരിചയസമ്പന്നനായ വിപുലും ചേര്ന്ന് ടീമിനെ വന് തകര്ച്ചയില് നിന്ന് രക്ഷിച്ചു. ക്യാപ്റ്റന്റെ ഇന്നിങ്സ് കളിച്ച സര്ഫ്രാസ് 54 റണ്സും വിപുല് 59 റണ്സും നേടി പൊരുതിയതോടെ ഡെര്ബിഷയറിന്റെ ഒന്നാം ഇന്നിങ്സ് 168 റണ്സില് അവസാനിച്ചു.ഒന്നാം ഇന്നിങ്സ് ലീഡുമായി റൊഹാന് സിസി രണ്ടാം ഇന്നിങ്സ് ആരംഭിക്കാനിരിക്കെ, മത്സരം കടുത്ത ആവേശത്തിലേക്കാണ് നീങ്ങുന്നത്. കാണികളായി നിരവധി പ്രാദേശിക ക്രിക്കറ്റ് ആരാധകരാണ് മുചുകുന്ന് ഗ്രൗണ്ടില് തടിച്ചു കൂടിയത്.
;
