കനത്ത മഴയ്ക്ക് സാധ്യത: കോഴിക്കോട് ജില്ലയിൽ രാത്രി യാത്രയ്ക്ക് നിയന്ത്രണം
കോഴിക്കോട്: ബംഗാൾ ഉൾക്കടലിൽ രൂപപ്പെട്ട തീവ്ര ന്യൂനമർദത്തിന്റെ സ്വാധീനഫലമായി സെപ്റ്റംബർ 24 വൈകീട്ട് മുതൽ സെപ്റ്റംബർ 25 പകൽ വരെ കോഴിക്കോട് ജില്ലയിൽ ശക്തമായ കാറ്റിനും കനത്ത മഴയ്ക്കും സാധ്യതയുണ്ടെന്ന് മുന്നറിയിപ്പ്. മലേയാര മേഖലകളിൽ ഉരുൾപൊട്ടൽ, മണ്ണിടിച്ചിൽ, മരം വീഴൽ, പെട്ടെന്നുള്ള വെള്ളപ്പൊക്കം എന്നിവയ്ക്ക് സാധ്യതയുള്ളതിനാൽ പൊതുജനങ്ങൾ അതീവ ജാഗ്രത പാലിക്കണമെന്ന് ജില്ലാ ദുരന്തനിവാരണ അതോറിറ്റി അറിയിച്ചു.
അപകടസാധ്യത കണക്കിലെടുത്ത് കോഴിക്കോട് ജില്ലയിലെ മലയോര, ഉയർന്ന പ്രദേശങ്ങളിലേക്കുള്ള അത്യാവശ്യമല്ലാത്ത എല്ലാ യാത്രകൾക്കും സെപ്റ്റംബർ 24 രാത്രി 7 മണി മുതൽ സെപ്റ്റംബർ 25 രാവിലെ 7 മണി വരെ പൂർണ നിരോധനം ഏർപ്പെടുത്തി ജില്ലാ കളക്ടർ ഉത്തരവിട്ടു. താമരശ്ശേരി, തിരുവമ്പാടി, കൂരാച്ചുണ്ട് തുടങ്ങിയ മലയോര മേഖലകളിലെ മണ്ണിടിച്ചിൽ സാധ്യതയുള്ള റോഡുകളിൽ പൊലീസ് ഗതാഗതം പൂർണമായും നിയന്ത്രിക്കും. ദുരന്തനിവാരണവുമായി ബന്ധപ്പെട്ട അടിയന്തര വാഹനങ്ങൾക്ക് നിയന്ത്രണത്തിൽ ഇളവുണ്ടാകും.
നദികൾ, ക്വാറികൾ, വിനോദസഞ്ചാര കേന്ദ്രങ്ങൾ, കടൽത്തീരങ്ങൾ എന്നിവിടങ്ങളിൽ വിനോദത്തിനും മീൻപിടിത്തത്തിനുമായി ഇറങ്ങുന്നത് കർശനമായി നിരോധിച്ചിട്ടുണ്ട്.
ജില്ലയിലെ താലൂക്ക് എമർജൻസി ഓപ്പറേഷൻ സെന്ററുകൾ (TEOC) 24 മണിക്കൂറും പ്രവർത്തിക്കും. എല്ലാ വില്ലേജുകളിലും മഴയുടെ അളവും ജലനിരപ്പും ഓരോ മണിക്കൂർ ഇടവിട്ട് ശേഖരിച്ച് ജില്ലാ എമർജൻസി ഓപ്പറേഷൻ സെന്ററിലേക്ക് (DEOC) കൈമാറും.
അപകടസാധ്യതയുള്ള പ്രദേശങ്ങളിലെ ജനങ്ങളെ ആവശ്യമായ സാഹചര്യത്തിൽ സുരക്ഷിത കേന്ദ്രങ്ങളിലേക്കോ ദുരിതാശ്വാസ ക്യാമ്പുകളിലേക്കോ സെപ്റ്റംബർ 24ന് തന്നെ മാറ്റിപ്പാർപ്പിക്കാൻ തദ്ദേശസ്വയംഭരണ സ്ഥാപനങ്ങളും വില്ലേജ് ഓഫീസർമാരും നടപടി സ്വീകരിക്കും. ക്യാമ്പുകളുടെ വിവരങ്ങളും ഹെൽപ്ലൈൻ നമ്പറുകളും പ്രാദേശികമായി ജനങ്ങളെ അറിയിക്കും.
പൊലീസ്, ഫയർ ആൻഡ് റെസ്ക്യൂ, സിവിൽ ഡിഫൻസ്, ആപദ മിത്ര, നെഹ്റു യുവകേന്ദ്ര (NYKS) സന്നദ്ധപ്രവർത്തകർ എന്നിവരെ അടിയന്തര രക്ഷാപ്രവർത്തനങ്ങൾക്കായി സജ്ജമാക്കിയിട്ടുണ്ട്.
അടിയന്തര സാഹചര്യം ഉണ്ടാകുന്ന പക്ഷം അധികൃതരുടെ നിർദേശങ്ങൾ കർശനമായി പാലിക്കണമെന്നും അനാവശ്യ യാത്രകൾ ഒഴിവാക്കണമെന്നും ജില്ലാ ഭരണകൂടം പൊതുജനങ്ങളോട് അഭ്യർഥിച്ചു. ദുരന്തനിവാരണ നിയമപ്രകാരം പുറപ്പെടുവിച്ച നിർദേശങ്ങൾ ലംഘിക്കുന്നവർക്കെതിരെ നിയമനടപടി സ്വീകരിക്കുമെന്നും ജില്ലാ ദുരന്തനിവാരണ അതോറിറ്റി അറിയിച്ചു.
