തലമുറകൾ കൈകോർത്തു; പുളിയഞ്ചേരി യു.പി. സ്കൂൾ പുസ്തകോത്സവം ശ്രദ്ധേയമായി
കൊയിലാണ്ടി: പുളിയഞ്ചേരി യു.പി. സ്കൂളിന്റെ ‘RAINBOW 2026–27’ സമഗ്ര വിദ്യാഭ്യാസ പദ്ധതിയുടെ ഭാഗമായി ഓണാഘോഷത്തോടനുബന്ധിച്ച് സംഘടിപ്പിച്ച പുസ്തകോത്സവത്തിൽ രണ്ട് തലമുറകളിലെ സ്കൂൾ ലീഡർമാർ കൈകോർത്തത് വേറിട്ട അനുഭവമായി.
1987-ലെ സ്കൂൾ ലീഡറായി തെരഞ്ഞെടുക്കപ്പെട്ട രതീഷ് കുമാർ കിഴ്പുനത്തിൽ, നിലവിലെ സ്കൂൾ ലീഡർ ധ്രുവദർശ് വി.യെ കൈപിടിച്ച് അഭിനന്ദിച്ചു. പുസ്തകോത്സവ നഗരിയിൽ വെച്ച് നടന്ന ഈ ഒത്തുചേരൽ അധ്യാപകർക്കും വിദ്യാർത്ഥികൾക്കും ഒരുപോലെ ആവേശമായി മാറി.
തന്റെ പുളിയഞ്ചേരി യു. പി. സ്കൂൾ കാലത്തെ മനോഹരമായ ഓർമകൾ രതീഷ് കുമാർ ചടങ്ങിൽ പങ്കുവെച്ചു. പഴയ അധ്യാപകരും സുഹൃത്തുക്കളും സ്കൂളിലെ കലാ-കായിക മത്സരങ്ങളും നിറഞ്ഞുനിന്ന ആ സുന്ദരകാലം അദ്ദേഹം ഓർത്തെടുത്തു. “നിറഞ്ഞ മനസ്സോടെ, പ്രതീക്ഷയോടെ ഇനിയും പരമാവധി സ്കൂളിലെത്താൻ ശ്രമിക്കും” എന്ന അദ്ദേഹത്തിന്റെ വാക്കുകൾ വിദ്യാലയത്തിന് വലിയ ഊർജമാണ് പകർന്നു നൽകിയത്.
കാലം മാറിയാലും വിദ്യാലയത്തോടുള്ള സ്നേഹത്തിന് മാറ്റമില്ലെന്ന് തെളിയിക്കുന്നതായിരുന്നു രണ്ട് തലമുറകളിലെ സ്കൂൾ ലീഡർമാരുടെ ഈ കൈകോർക്കൽ. ചടങ്ങിൽ സ്കൂൾ അധികൃതരും അധ്യാപകരും പിടിഎ പ്രതിനിധികളും വിദ്യാർത്ഥികളും പങ്കെടുത്തു.
