64-മത് കോഴിക്കോട് റവന്യൂ ജില്ലാ സ്കൂള് കലോത്സവത്തിന് തിരിക്കൊളുത്തി
കൊയിലാണ്ടി: കേള്വി പ്രശ്നം, വലതുകൈയും വലതുകാലും സംബന്ധിച്ച ആരോഗ്യപ്രശ്നങ്ങളും നേരിടുന്ന അഞ്ചാം ക്ലാസ് വിദ്യാര്ത്ഥിയായ മാസ്റ്റര് ആദികേഷ് പി ആണ് കലോത്സവത്തിന്റെ ഔപചാരിക ഉദ്ഘാടനം നിര്വ്വഹിച്ചത്.
തന്റെ പ്രയാസങ്ങളെ അതിജീവിച്ച് ആത്മവിശ്വാസത്തോടെ വേദിയിലേക്ക് എത്തിയ ആദികേഷ്, ഉദ്ഘാടനംചടങ്ങിന്റെ ഭാഗമായി ഡ്രം വായിച്ച് വേദിയെ ആവേശഭരിതമാക്കി. കലാവേദിയില് വിദ്യാര്ത്ഥിയുടെ അവതരണം അധ്യാപകരിലും വിദ്യാര്ത്ഥികളിലും അതുല്യമായ ഒരു പ്രചോദനമായി.
ചടങ്ങില് പ്രശസ്ത പിന്നണി ഗായകനായ വി. ടി. മുരളി വിശിഷ്ടാതിഥിയായി. കലാരംഗത്തെ അഭിരുചിയും പുതുതലമുറയ്ക്ക് നല്കിയ പ്രചോദനവും ചടങ്ങിന് പ്രത്യേക താളം പകര്ന്നു.
ഉദ്ഘാടനസമ്മേളനത്തില് ആര്. രാജേഷ് കുമാര്, അപര്ണ, ഗാനരചയിതാവ് രമേശ് കാവില്, ആര്. ശരത്, ജയദാസ് കെ, അബ്ദുല് ഹക്കീം, മുഹമ്മദ് ബഷീര് ടി. പി, ബിജേഷ് ഉപ്പള, മഞ്ജു എം. കെ, പ്രമോദ് കെ. വി, മുഹമ്മദ് ലുക്മാന്, സബിത ടി, സി. കെ. ബാലകൃഷ്ണന് എന്നിവരും പങ്കെടുത്ത് കലോത്സവത്തിന് അനുഗ്രഹമായ സാന്നിധ്യമായി.
മാസ്റ്റര് ആദികേഷിന്റെ ധൈര്യവും സമര്പ്പണവും ആദരിച്ച് സംഘാടകര് വിദ്യാര്ത്ഥിക്ക് ഉപഹാരം സമ്മാനിച്ചു. കലാകൌമാരത്തിന് പുതിയ കൈയ്യൊപ്പ് നല്കിയ ഈ നിമിഷം കലാ വേദിയിലെ എല്ലാവരുടെയും ഹൃദയം കവര്ന്നു.
