കടലും കടല്സമ്പത്തും കോര്പ്പറേറ്റുകള്ക്ക് അടിയറവയ്ക്കുന്ന കേന്ദ്ര സര്ക്കാരിനെതിരെ : കടല് സുരക്ഷാശൃംഖല സംഘടിപ്പിച്ചു.
കൊയിലാണ്ടി: കടലും കടല്സമ്പത്തും കോര്പ്പറേറ്റുകള്ക്ക് അടിയറവയ്ക്കുന്ന കേന്ദ്ര സര്ക്കാരിനെതിരെ കടല് കടലിന്റെ മക്കള്ക്ക് എന്ന മുദ്രാവാക്യവുമായി മത്സ്യത്തൊഴിലാളി ഫെഡറേഷന് (സി ഐ ടി യു ) നേതൃത്വത്തില് കടല് സുരക്ഷാശൃംഖല സംഘടിപ്പിച്ചു. മത്സ്യത്തൊഴിലാളി യൂനിയന് (സിഐടിയു) കൊയിലാണ്ടി, പയ്യോളി ഏരിയ കമ്മിറ്റികളുടെ നേതൃത്വത്തില് ഹാര്ബര് റോഡില് പഴയ മാര്ക്കറ്റ് പരിസരത്ത് നടത്തിയ കടല് സുരക്ഷാശൃംഖല സി ഐ ടി യു സംസ്ഥാന സെക്രട്ടറി ടി പി രാമകൃഷ്ണന് എം എല് എ ഉദ്ഘാടനം ചെയ്തു.
മത്സ്യത്തൊഴിലാളികളുടെ വള്ളങ്ങള്ക്ക് ആവശ്യമായ മണ്ണെണ്ണ പോലും നല്കാത്ത കേന്ദ്ര സര്ക്കാര് കോര്പ്പറേറ്റ് വല്ക്കരണത്തിലൂടെ മത്സ്യത്തൊഴിലാളികളുടെ കുടുംബ ബന്ധങ്ങള് പോലും തകര്ക്കുമെന്ന് ടി പി രാമകൃഷ്ണന് പറഞ്ഞു. മത്സ്യതൊഴിലാളി ഫെഡറേഷന് (സി ഐ ടി യു ) ജില്ലാ പ്രസിഡന്റ് കെ. ദാസന് അധ്യക്ഷതവഹിച്ചു.
സി പി ഐ എം ജില്ലാ സെക്രട്ടറിയേറ്റംഗം കെ കെ മുഹമ്മദ്, കാനത്തില് ജമീല എം എല് എ, സി പി ഐ എം ജില്ലാ കമ്മറ്റിയംഗം പി വിശ്വന്, ഏരിയാ സെക്രട്ടറി ടി കെ ചന്ദ്രന്, സി ഐ ടി യു ഏരിയാ സെക്രട്ടറി സി അശ്വനി ദേവ്, സി എം സുനിശേന്, പി വി സചീന്ദ്രന് , അബ്ദുറഹിമാന്, ടി. വി. ദാമോധരന്, എ. പി. ഉണ്ണിക്കൃഷ്ണന് എന്നിവര് സംസാരിച്ചു.
