ജില്ലാ സൈക്കിള്‍ പോളോ ചാമ്പ്യന്‍ഷിപ്പ്: കൊയിലാണ്ടി സ്പീഡ് അക്കാദമിക്ക് വിജയക്കുതിപ്പ്
കൊയിലാണ്ടി: അഭിമാനവിജയത്തിന്റെ പെരുമഴ തീര്‍ത്ത് കൊയിലാണ്ടി സ്പീഡ് അക്കാദമി ജില്ലാ സൈക്കിള്‍ പോളോ ചാമ്പ്യന്‍ഷിപ്പില്‍ തിളക്കമാര്‍ന്ന നേട്ടം സ്വന്തമാക്കി. ആവേശകരമായ പോരാട്ടങ്ങള്‍ക്കൊടുവില്‍ പങ്കെടുത്ത ആറ് വിഭാഗങ്ങളിലും മികച്ച വിജയം കരസ്ഥമാക്കിയാണ് അക്കാദമി കായിക പ്രേമികളുടെ ശ്രദ്ധ പിടിച്ചുപറ്റിയത്.
പെണ്‍കുട്ടികളുടെ വിഭാഗത്തില്‍ കൊയിലാണ്ടി സ്പീഡ് അക്കാദമിയുടെ സമ്പൂര്‍ണ്ണാധിപത്യമാണ് മൈതാനത്ത് കണ്ടത്. സബ് ജൂനിയര്‍ ഗേള്‍സ്, ജൂനിയര്‍ ഗേള്‍സ്, സീനിയര്‍ ഗേള്‍സ് എന്നീ മൂന്ന് വിഭാഗങ്ങളിലും അക്കാദമി ഒന്നാം സ്ഥാനം നേടി ചാമ്പ്യന്മാരായി. ആണ്‍കുട്ടികളുടെ വിഭാഗത്തില്‍ സബ് ജൂനിയര്‍ ബോയ്‌സ്, സീനിയര്‍ ബോയ്‌സ് ഇനങ്ങളില്‍ രണ്ടാം സ്ഥാനവും, ജൂനിയര്‍ ബോയ്‌സ് വിഭാഗത്തില്‍ മൂന്നാം സ്ഥാനവും അക്കാദമി സ്വന്തമാക്കി.
മത്സരത്തില്‍ പങ്കെടുത്ത ബഹുഭൂരിപക്ഷം വിദ്യാര്‍ത്ഥികള്‍ക്കും വരാനിരിക്കുന്ന സംസ്ഥാന ചാമ്പ്യന്‍ഷിപ്പിലേക്ക് യോഗ്യത നേടാനായി എന്നത് ഈ വിജയത്തിന്റെ തിളക്കം ഇരട്ടിയാക്കുന്നു. കുട്ടികളുടെ കഠിനാധ്വാനത്തിന്റെയും കൂട്ടായ പരിശ്രമത്തിന്റെയും വലിയൊരു അംഗീകാരമാണിത്.
മികച്ച പരിശീലനവും ചിട്ടയായ മുന്നൊരുക്കവും കുട്ടികളുടെ ആത്മാര്‍ത്ഥമായ പരിശ്രമവുമാണ് ഉജ്ജ്വല വിജയത്തിന് പിന്നിലെ കരുത്തെന്ന് ഭാരവാഹികള്‍ പറഞ്ഞു. ഓരോ പരിശീലനവേളയിലും വിയര്‍പ്പൊഴുക്കിയ താരങ്ങള്‍ തങ്ങളുടെ കഴിവും ആത്മവിശ്വാസവും മൈതാനത്ത് തെളിയിച്ചപ്പോള്‍ കൊയിലാണ്ടിയുടെ കായികമേഖലയ്ക്ക് അത് വലിയൊരു അഭിമാനനിമിഷമായി മാറി.
ഈ ചരിത്രനേട്ടത്തിന് പിന്നില്‍ പ്രവര്‍ത്തിച്ച പരിശീലകര്‍, ടീം മാനേജര്‍മാര്‍, രക്ഷിതാക്കള്‍, പിന്തുണച്ചവര്‍ എല്ലാവര്‍ക്കും അക്കാദമി ചെയര്‍മാന്‍ ശ്രീലാല്‍ പെരുവട്ടൂര്‍, ഭാരവാഹികളായ നവീന ബിജു, ഷിംന പൂക്കാട്, കോച്ച് ആര്‍ദ്ര എന്നിവര്‍ നന്ദി അറിയിച്ചു.
