കരിയാത്തുംപാറയിൽ ആറ് വയസുകാരി മുങ്ങി മരിച്ചു
കോഴിക്കോട്: കരിയാത്തുംപാറയിൽ ആറ് വയസുകാരി മുങ്ങി മരിച്ചു. ഫറോക്ക് ചുങ്കം സ്വദേശി കെ. ടി അഹമ്മദിൻ്റെയും പി. കെ നസീമയുടെയും മകൾ അബ് റാറയാണ് മരിച്ചത്. ഫറോക്ക് ചന്ത എൽപി സ്കൂളിലെ ഒന്നാം ക്ലാസ് വിദ്യാർഥിനിയാണ്.
മാതാപിതാക്കൾക്കൊപ്പം വിനോദ സഞ്ചാര കേന്ദ്രത്തിലെത്തിയതായിരുന്നു. പുഴയിൽ കുളിക്കുന്നതിനിടെയാണ് മരണം. ഇന്നലെ വൈകിട്ട് മൂന്ന് മണിയോടെയാണ് കുട്ടിയും കുടുംബവും കരിയാത്തുംപാറയിൽ എത്തിയത്. പുഴയിൽ മറ്റ് കുട്ടികളോടൊപ്പം കളിക്കുമ്പോഴായിരുന്നു അപകടം. കാൽ മുട്ടോളം മാത്രമേ പുഴയിൽ വെള്ളം ഉണ്ടായിരുന്നുള്ളു. ഉടൻ തന്നെ കുട്ടിയെ കൂരാച്ചുണ്ടിലെ ആശുപത്രിയിലും തുടർന്ന് മൊടക്കല്ലൂർ എംഎംസി ആശുപത്രിയിലും എത്തിച്ചെങ്കിലും ജീവൻ രക്ഷിക്കാനായില്ല.
