വിജയത്തില് തെല്ലും അഹങ്കരിക്കാതെ ജനങ്ങള്ക്കിടയിലേക്ക് കൂടുതല് ഇറങ്ങിച്ചെല്ലാനും പ്രവര്ത്തിക്കാനും സന്നദ്ധരാവണം; ഷാഫി പറമ്പില് എം പി
കോഴിക്കോട്: തദ്ദേശ തിരഞ്ഞെടുപ്പില് യുഡിഎഫിന് ഗംഭീര വിജയം സമ്മാനിച്ച ജനങ്ങളോട് ഐക്യ ജനാധിപത്യ മുന്നണിയിലെ ഓരോ കോണ്ഗ്രസ് പ്രവര്ത്തകന്റെയും പേരില് നന്ദി അറിയിക്കുന്നതായി ഷാഫി പറമ്പിള് എം പി. വിജയത്തില് തെല്ലും അഹങ്കരിക്കാതെ ജനങ്ങള്ക്കിടയിലേക്ക് കൂടുതല് ഇറങ്ങിച്ചെല്ലാനും അവര് ആഗ്രഹിക്കുന്ന തലത്തില് പ്രവര്ത്തിക്കാനും സന്നദ്ധരാണെന്നും ഷാഫി പറമ്പില് എം പി അറിയിച്ചു.
എല്ഡിഎഫിനുണ്ടായ പരാജയത്തില് ഷാഫി സര്ക്കാരിനെ രൂക്ഷമായി വിമര്ശിച്ചു. കേരളത്തിലെ ജനങ്ങള് സര്ക്കാരിനെ നിര്ത്തിപൊരിച്ചിരിക്കുകയാണ്. തിരുവനന്തപുരം മുതല് കാസര്കോട് വരെയുള്ള എല്ലാ ഇടതുകോട്ടകളെയും പൊളിച്ചെഴുതി എല്ലാ മേല്കോയ്മയും അവസാനിപ്പിച്ച്, എല്ലാ കള്ളസഖ്യങ്ങളെയും തുറന്നുകാണിച്ചാണ് ഈ തിരഞ്ഞെടുപ്പില് ജനങ്ങള് യുഡിഎഫിനൊപ്പം നിന്നിട്ടുള്ളത്. ഇത് കേരളത്തിലെ മുഖ്യമന്ത്രിക്കും സര്ക്കാരിനുമെതിരായ വിധിയെഴുത്താണെന്ന് പറയാതിരിക്കാനാകില്ലെന്നും ഷാഫി പറഞ്ഞു.
504-ല് അധികം പഞ്ചായത്തുകളില് ഐക്യജനാധിപത്യ മുന്നണി വിജയിച്ച് വരുന്ന സാഹചര്യമുണ്ടാകുന്നു. 54-ല് അധികം മുനിസിപ്പാലിറ്റികള് യുഡിഎഫിനാണ്. സിപിഎമ്മിന്റെ കുത്തകയായിരുന്ന കോര്പറേഷനുകള് പോലും പൊളിച്ചെഴുതുന്ന തരത്തിലുള്ള ഒരു വിധിയെഴുത്ത്. അടപടലം ഇവര് പരാജയപ്പെട്ടിരിക്കുകയാണെന്നും ഷാഫി പറമ്പില് പരിഹസിച്ചു.
അധികാരത്തില് ഇരിക്കുന്നവരുടേതിനെക്കാള് വലിയ ശക്തി ജനങ്ങളുടേതാണ് എന്ന് അവരെയും ഞങ്ങളെയുമൊക്കെ ബോധ്യപ്പെടുത്തുന്ന തിരഞ്ഞെടുപ്പ് ഫലമാണിതെന്നും ജനാധിപത്യത്തിലെ ഉടയോന് ജനങ്ങള് തന്നെയാണെന്ന് ഒരിക്കല് കൂടി എല്ലാ രാഷ്ട്രീയ പാര്ട്ടികളെയും ബോധ്യപ്പെടുത്തുന്ന ഫലമാണിതെന്നും ഷാഫി പറമ്പില് അഭിപ്രായപ്പെട്ടു.
