മികച്ച ജാഗ്രതാ സമിതിക്കുള്ള പുരസ്കാരം ഏറ്റുവാങ്ങി കൊയിലാണ്ടി നഗരസഭ
കൊയിലാണ്ടി: വനിതാ കമ്മീഷന്റെ മികച്ച ജാഗ്രതാ സമിതിക്കുള്ള 2023-24 വർഷത്തെ പുരസ്കാരം ഏറ്റുവാങ്ങി കൊയിലാണ്ടി നഗരസഭ. തിരുവനന്തപുരം ഭാഗ്യമാല ഓഡിറ്റോറിയത്തിൽ നടന്ന ചടങ്ങിൽ മുഖ്യമന്ത്രി പിണറായി വിജയനിൽ നിന്നും നഗരസഭ ചെയർപേഴ്സൺ സുധ കിഴക്കേപ്പാട്ട് പുരസ്കാരം ഏറ്റു വാങ്ങി.
തനതായ പ്രവർത്തന ശൈലി കൊണ്ടും നഗരസഭയുടെ കൃത്യമായ ഇടപെടലുകളിലൂടെയുമാണ് നഗരസഭ ഈ നേട്ടം കൈവരിച്ചത്. സ്ത്രീകളുടെയും കുട്ടികളുടെയും രംഗത്തുള്ള നിരന്തര പ്രവർത്തനവും ജാഗ്രതാ സമിതികളുടെ പ്രവർത്തനങ്ങളും ഏകോപിപ്പിക്കുവാൻ നഗരസഭയുടെ ‘പെണ്ണിടം’ വുമൺ ഫെസിലിറ്റേഷൻ സെന്ററും പ്രവർത്തിക്കുന്നു.
വനിതാ ഹെൽപ് ഡസ്ക്, കൗൺസിലിംഗ് സേവനം, നിയമസഹായം, റെഫറൽ സേവനം, ഫുഡ് ഓൺ വാൾ തുടങ്ങിയ സേവനങ്ങളും പെണ്ണിടത്തിലൂടെ നഗരസഭ ജനങ്ങളിലേക്ക് എത്തിക്കുന്നുണ്ട്. വനിതാദിന പരിപാടികൾ നടത്തുന്നതിനായി വുമൺ ഇനിഷ്യറ്റീവ് ഫോർ ഹാപ്പിനെസ്സ് എന്ന പേരിൽ വനിതാ ഗ്രൂപ്പും നഗരസഭയിൽ പ്രവർത്തിച്ച് വരുന്നു.
എല്ലാ സ്കൂളിലും ജാഗ്രതാ സമിതികൾ രൂപീകരിക്കുകയും കുട്ടികളുടെ മാനസിക ആരോഗ്യം മെച്ചപ്പെടുത്തുന്നതിനായി കൗൺസിലിംഗ് സേവനവും നൽകി വരുന്നു. വയോജന ക്ഷേമം ഉറപ്പുവരുത്തുവാനും വാർഡ് തലത്തിൽ വായോക്ലബ്ബുകളും, വയോജനങ്ങളുടെ പരാതികളും പ്രശ്നങ്ങളും കേൾക്കുവാൻ എല്ലാ വാർഡിലും വയോജന ജാഗ്രതാ സമിതിയും ചേരുന്നു. നഗരസഭയുടെ പരിധിയിൽ വരുന്ന എല്ലാ ഓഫീസുകളിലും ഐസിസി രൂപീകരിച്ച് സ്ത്രീകൾക്ക് പ്രശ്നങ്ങൾ ഇല്ലാതെ ജോലിചെയ്യാനുള്ള ഇടം ഒരുക്കികൊടുക്കാൻ നഗരസഭക്ക് സാധിച്ചു.
പരാതികൾ അറിയിക്കുന്നതിനായി എല്ലാ വാർഡുകളിലും കംപ്ലയിന്റ് ബോക്സ് സ്റ്റാപിക്കുകയും ലീഗൽ സെല്ലിന്റെ സഹകരണത്തോടെ നിയമ ബോധവത്കരണ ക്ലാസും നഗരസഭയുടെ നേതൃത്വത്തിൽ നടത്തുന്നുണ്ട്. വിവാഹിതരാവാൻ പോവുന്നവർക്ക് പ്രീ മാരിറ്റൽ എഡ്യൂക്കേഷൻ പ്രോഗ്രാം എല്ലാ വർഷവും നഗരസഭ നടത്തി വരുന്നു. ഇതെല്ലാമാണ് കൊയിലാണ്ടി നഗരസഭയെ പുരസ്കാരത്തിന് അർഹമാക്കിയത്.
ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ കെ ഷിജു , വികസന കാര്യ സ്റ്റാൻ്റിംങ് കമ്മറ്റി ചെയർപേഴ്സൺ കെഎ ഇന്ദിര , പൊതുമരാമത്ത് സ്റ്റാൻ്റിങ് കമ്മറ്റി ചെയർമാൻ ഇ കെ അജിത്ത്, നഗരസഭ സെക്രട്ടറി ഇന്ദു എസ് ശങ്കരി , കൗൺസിലർമാരായ വി പി ഇബ്രാഹിം കുട്ടി , ജമാൽ , കെ ഷബില , അനുഷ്മ എന്നിവരും ചടങ്ങിൽ പങ്കെടുത്തു.
