ഹജ്ജ് 2025: മെഹ്റം സീറ്റിലേക്ക് അപേക്ഷ ക്ഷണിച്ചു
ഹജ്ജ് 2025: മെഹ്റം സീറ്റിലേക്ക് അപേക്ഷ ക്ഷണിച്ചു
തക്കതായ കാരണത്താല് ഹജ്ജിന് അപേക്ഷിക്കാന് കഴിയാതെ വന്ന സ്ത്രീകള്ക്ക് അവരുടെ പുരുഷ മെഹ്റം ഹജ്ജിന് ഇതിനകം തിരഞ്ഞെടുക്കപ്പെടുകയും പുരുഷ മെഹ്റം ഹജ്ജിന് പോകുന്നതോടെ പിന്നീട് ഹജ്ജ് നിര്വ്വഹിക്കാന് മറ്റു മെഹ്റം ഇല്ലാത്ത സ്ത്രീകള്ക്കായി നീക്കിവെച്ച സീറ്റിലേക്ക് കേന്ദ്ര ഹജ്ജ് കമ്മിറ്റി അപേക്ഷ ക്ഷണിച്ചു. ഇന്ത്യയിലൊട്ടാകെ 500 സീറ്റുകളാണ് ഇതിനായി നീക്കി വെച്ചത്. കൂടുതല് അപേക്ഷകരുണ്ടെങ്കില് നറുക്കെടുപ്പിലൂടെ തിരഞ്ഞെടുപ്പ് നടക്കും.
ഈ വിഭാഗത്തില് അപേക്ഷിക്കാന് യോഗ്യരായ സ്ത്രീകള് https://www.hajcommittee.gov.in എന്ന വെബ്സൈറ്റിലൂടെ ഓണ്ലൈന് ആയി അപേക്ഷിച്ച് രേഖകള് അപ്ലോഡ് ചെയ്യണം്. അപേക്ഷ സമര്പ്പിക്കാനുള്ള അവസാന തിയ്യതി 2024 ഡിസംബര് 9 ആണ്. ഓണ്ലൈന് അപേക്ഷകള് മാത്രമേ പരിഗണിക്കുകയുള്ളൂ. അപേക്ഷകര് ജീവിതത്തിലൊരിക്കലും ഹജ്ജ് കമ്മിറ്റി മുഖേനയോ, പ്രൈവറ്റായോ മറ്റേതെങ്കിലും രീതിയിലോ ഹജ്ജ് ചെയ്തിട്ടില്ലാത്തവരായിരിക്കണം. 2026 ജനുവരി 15 വരെയെങ്കിലും കാലാവധിയുള്ള പാസ്പോര്ട്ട് ഉണ്ടായിരിക്കണം. അപേക്ഷയില് പുരുഷ മെഹ്റവുമായുള്ള ബന്ധം വ്യക്തമാക്കുകയും, ബന്ധം തെളിയിക്കുന്ന രേഖ അപ്ലോഡ് ചെയ്യുകയും വേണം. ഒരു കവറില് പരമാവധി അഞ്ച് പേരായതിനാല് നിലവില് അഞ്ച് പേരുള്ള കവറുകളില് മെഹ്റം ക്വാട്ട അപേക്ഷ സമര്പ്പിക്കുവാന് കഴിയില്ല.
ഹജ്ജ് – 2025: വെയ്റ്റിംഗ് ലിസ്റ്റ് ക്രമനമ്പര് 1711 വരെയുള്ളവര്ക്കു അവസരം
അടുത്ത വര്ഷത്തെ ഹജ്ജ് കര്മ്മത്തിന് കേരള സംസ്ഥാന ഹജ്ജ് കമ്മിറ്റി മുഖേന അപേക്ഷിച്ച് നറുക്കെടുപ്പില് വെയ്റ്റിംഗ് ലിസ്റ്റിലുള്പ്പെട്ട ക്രമ നമ്പര് 1 മുതല് 1711 വരെയുള്ള അപേക്ഷകര്ക്ക് കൂടി ഹജ്ജിന് അവസരം ലഭിച്ചു.
വെയ്റ്റിംഗ് ലിസ്റ്റില് നിന്നും തിരഞ്ഞെടുക്കപ്പെട്ടവര് ഡിസംബര് 16ന് മുമ്പായി ആദ്യ ഗഡുവും രണ്ടാം ഗഡുവും ഉള്പ്പെടെ ഒരാള്ക്ക് 2,72,300 രൂപ അടക്കണം. ഓരോ കവര് നമ്പറിനും പ്രത്യേകം ലഭിക്കുന്ന ബാങ്ക് റഫറന്സ് നമ്പര് രേഖപ്പെടുത്തിയ പേ-ഇന് സ്ലിപ്പ് ഉപയോഗിച്ച് സ്റ്റേറ്റ് ബാങ്ക് ഓഫ് ഇന്ത്യ അല്ലെങ്കില് യൂണിയന് ബാങ്ക് ഓഫ് ഇന്ത്യ എന്നിവയുടെ ബ്രാഞ്ചിലോ, ഓണ്ലൈന് ആയോ പണമടക്കാവുന്നതാണ്.
ഇവര് പണമടച്ച പേ-ഇന് സ്ലിപ്പ്, നിശ്ചിത മാതൃകയിലുള്ള ഫോട്ടോ പതിച്ച മെഡിക്കല് സ്ക്രീനിംഗ് & ഫിറ്റ്നസ് സര്ട്ടിഫിക്കറ്റ് (സര്ട്ടിഫിക്കറ്റ് ഗവണ്മെന്റ് അലോപ്പതി ഡോക്ടര് പരിശോധിച്ചതാകണം), ഹജ്ജ് അപേക്ഷാ ഫോമും അനുബന്ധ രേഖകളും (അപേക്ഷയില് അപേക്ഷകനും, നോമിനിയും ഒപ്പിടണം) ഡിസംബര് 18-നകം സംസ്ഥാന ഹജ്ജ് കമ്മിറ്റി ഓഫീസില് സമര്പ്പിക്കണം. കൂടുതല് വിവരങ്ങള്ക്കായി സംസ്ഥാന ഹജ്ജ് കമ്മിറ്റി ഓഫീസുമായോ, സംസ്ഥാന ഹജ്ജ് കമ്മിറ്റിയുടെ ജില്ലാ ട്രൈനിംഗ് ഓര്ഗനൈസര്മാരുമായോ, മണ്ഡലം ട്രൈനിംഗ് ഓര്ഗനൈസര്മാരുമായോ ബന്ധപ്പെടാവുന്നതാണ്. Phone: 0483-2710717. Website: https://hajcommittee.gov.in.
ഹജ്ജ് – 2025: രണ്ടാം ഗഡു ഡിസംബര് 16നകം അടക്കണം
ഹജ്ജിന് ആദ്യ ഘട്ടത്തില് തിരഞ്ഞെടുക്കപ്പെട്ട് രേഖകള് സമര്പ്പിച്ചവര് രണ്ടാം ഗഡു തുകയായ 1,42,000 രൂപ ഡിസംബര് 16 നകം അടക്കണമെന്ന് കേന്ദ്ര ഹജ്ജ് കമ്മിറ്റി അറിയിച്ചു. ഹജ്ജിനായി അടക്കേണ്ട ബാക്കി സംഖ്യ വിമാന ചാര്ജ്, സൗദിയിലെ ചെലവ് തുടങ്ങിയവ കണക്കാക്കി അപേക്ഷകരുടെ എമ്പാര്ക്കേഷന് അടിസ്ഥാനത്തില് കേന്ദ്ര ഹജ്ജ് കമ്മിറ്റി പിന്നീട് അറിയിക്കും. തുക സംബന്ധിച്ച വിവരങ്ങള് ഹജ്ജ് കമ്മിറ്റിയുടെ വെബ്സൈറ്റില് ലഭ്യമാകുന്നതാണ്.
മീഡിയ / ജേണലിസ്റ്റ് അക്രഡിറ്റേഷന് പുതുക്കല് നവംബര് 30 വരെ
മീഡിയ / ജേണലിസ്റ്റ് അക്രഡിറ്റേഷന് 2025-ലേക്കു പുതുക്കാന് ഓണ്ലൈനായി 2024 നവംബര് 30 വരെ ഓണ്ലൈനായി അപേക്ഷിക്കാം. റിപ്പോര്ട്ടര്മാര് മീഡിയാ വിഭാഗത്തിലും എഡിറ്റോറിയല് ജീവനക്കാര് ജേണലിസ്റ്റ് വിഭാഗത്തിലുമാണ് അപേക്ഷിക്കേണ്ടത്.
ഓണ്ലൈനായിhttp://www.iiitmk.ac.in/iprd/login.phpഎന്ന പേജിലെത്തി അക്രഡിറ്റേഷന് നമ്പരും പാസ്വേഡും ടൈപ്പ് ചെയ്താല് നിലവിലുള്ള പ്രൊഫൈല് പേജ് ലഭിക്കും. പാസ്വേഡ് ഓര്മയില്ലാത്തവര് ‘ഫോര്ഗോട്ട് പാസ്വേഡ്’ വഴി റീസെറ്റ് ചെയ്താല് പുതിയ പാസ്വേഡ് നിങ്ങളുടെ അക്രഡിറ്റേഷന് കാര്ഡില് നല്കിയിട്ടുള്ള ഇ-മെയില് ഐഡിയില് എത്തും. (പുതിയ പാസ്വേഡ് മെയിലിന്റെ ഇന്ബോക്സില് കണ്ടില്ലെങ്കില് സ്പാം ഫോള്ഡറില് കൂടി പരിശോധിക്കണം.)
പ്രൊഫൈലില് പ്രവേശിച്ചാല് ‘റിന്യൂ രജിസ്ട്രേഷന്’ എന്ന ലിങ്ക് വഴി ആവശ്യമായ തിരുത്തലുകളും പുതിയ വിവരങ്ങളും ഫോട്ടോയും ഒപ്പും ചേര്ക്കാം. തുടര്ന്ന്, അപ്ഡേഷനുകള് ‘കണ്ഫേം’ ചെയ്ത് പ്രിന്റ് എടുത്ത് ബ്യൂറോ ചീഫിന്റെയോ ന്യൂസ് എഡിറ്ററുടെയോ ഒപ്പും സീലുമായി സാക്ഷ്യപത്രത്തോടെ ജില്ലാ ഇന്ഫര്മേഷന് ഓഫീസില് സമര്പ്പിക്കണം. നിലവില് ഉള്ള കാര്ഡിന്റെ ഫോട്ടോ കോപ്പിയും അപേക്ഷയോടൊപ്പം സമര്പ്പിക്കണം.
പ്രിന്റൗട്ടുകള് ജില്ലാ ഇന്ഫര്മേഷന് ഓഫീസുകളില് നവംബര് 30ന് വൈകിട്ട് അഞ്ചിന് മുമ്പ് നിര്ബന്ധമായും സമര്പ്പിക്കണം.
2024ല് ഓണ്ലൈനായി അപേക്ഷിച്ച് കാര്ഡ് നേടിയവര്ക്കും പുതിയതായി അക്രഡിറ്റേഷന് ലഭിച്ചവര്ക്കുമാണ് ഇത്തവണ പുതുക്കാന് അവസരമുള്ളത്. അടുത്ത വര്ഷത്തേക്ക് പുതുക്കാത്തവരുടെ അക്രഡിറ്റേഷന് റദ്ദാകും. കൂടുതല് വിവരങ്ങള്ക്ക് ജില്ലാ ഇന്ഫര്മേഷന് ഓഫീസുമായി ബന്ധപ്പെടണം.
