കേരളത്തില് നിന്നുള്ള എംപിമാര് ലോക്സഭയില് സത്യപ്രതിജ്ഞ ചെയ്തു. പ്രോ ടെം സ്പീക്കര് ഭര്തൃഹരി സത്യവാചകം ചൊല്ലിക്കൊടുത്തു
ഡല്ഹി: കേരളത്തില് നിന്നുള്ള എംപിമാര് ലോക്സഭയില് സത്യപ്രതിജ്ഞ ചെയ്തു. പ്രോ ടെം സ്പീക്കര് ഭര്തൃഹരി സത്യവാചകം ചൊല്ലിക്കൊടുത്തു. കാസര്കോട് എംപി രാജ്മോഹന് ഉണ്ണിത്താന് ദൈവനാമത്തില് സത്യപ്രതിജ്ഞ ചെയ്ത് ആരംഭിച്ചു. പിന്നാലെ കണ്ണൂര് എംപി കെ സുധാകരന് സത്യപ്രതിജ്ഞ ചെയ്തു. വടകര എംപി ഷാഫി പറമ്പില് ഭരണഘടന ഉയര്ത്തിപ്പിടിച്ച് ഇംഗ്ലീഷില് ദൃഢപ്രതിജ്ഞ ചെയ്തു.
തുടര്ന്ന് എം കെ രാഘവന്, ഇ ടി മുഹമ്മദ് ബഷീര്, എം പി അബ്ദുസമദ് സമദാനി, വി കെ ശ്രീകണ്ഠന്, കെ രാധാകൃഷ്ണന്, ബെന്നി ബെഹനാന്, ഹൈബി ഈഡന്, ഡീന് കുര്യാക്കോസ്, കെ സി വേണുഗോപാല്, ഫ്രാന്സിസ് ജോര്ജ്, കൊടിക്കുന്നില് സുരേഷ്, എന് കെ പ്രേമചന്ദ്രന്, അടൂര് പ്രകാശ് എന്നിവര് സത്യപ്രതിജ്ഞ ചെയ്തു.
എറണാകുളം എംപി ഹൈബി ഈഡന് ഹിന്ദിയിലാണ് സത്യപ്രതിജ്ഞ ചെയ്തത്. കെ രാധാകൃഷ്ണന് മലയാളത്തില് ദൃഢപ്രതിജ്ഞ ചെയ്തു. എന് കെ പ്രേമചന്ദ്രന് ഇംഗ്ലീഷില് ദൃഢപ്രതിജ്ഞ ചെയ്തു. ഡീന് കുര്യാക്കോmd, വി കെ ശ്രീകണ്ഠന്, കെ സി വേണുഗോപാല് തുടങ്ങിയവര് ഭരണഘടന ഉയര്ത്തിപ്പിടിച്ചാണ് സത്യപ്രതിജ്ഞ ചെയ്തത്. തിരുവനന്തപുരം എംപി ശശി തരൂര് സ്ഥലത്തില്ലാത്തതിനാല് മറ്റൊരു ദിവസം സത്യപ്രതിജ്ഞ ചെയ്യും.
പ്രോ ടെം പാനലില് സത്യപ്രതിജ്ഞ ചെയ്യാനില്ലെന്ന് രാവിലെത്തന്നെ വ്യക്തമാക്കിയ കൊടിക്കുന്നില് കേരളത്തിലെ മറ്റ് എംപിമാര്ക്കൊപ്പമാണ് സത്യപ്രതിജ്ഞ ചെയ്തത്. പ്രോ ടെം സ്പീക്കറുടെ പാനലില് നിന്ന് ഇന്ഡ്യ സഖ്യം പിന്മാറുകയായിരുന്നു. കൊടിക്കുന്നില് സുരേഷിനെ പ്രോ ടെം സ്പീക്കറാക്കാത്തതിലുള്ള പ്രതിഷേധത്തിന്റെ ഭാഗമായാണ് തീരുമാനം.
