കവിയൂര് പൊന്നമ്മ അന്തരിച്ചു
കവിയൂര് പൊന്നമ്മ അന്തരിച്ചു. 79 വയസായിരുന്നു. എറണാകുളം ലിസി ആശുപത്രിയില് ചികിത്സയിലായിരുന്നു. വാര്ദ്ധക്യ സഹജമായ അസുഖങ്ങളെ തുടര്ന്ന് ഒരു മാസത്തിലേറെയായി ചികിത്സയിലായിരുന്നു നടി.
14 വയസ് മുതല് 79 വയസ് വരെ നീളുന്ന അസാധ്യമായ കലാസപര്യയ്ക്കാണ് കവിയൂര് പൊന്നമ്മ വിട പറയുമ്പോള് തിരശീല വീഴുന്നത്. പതിനാലാമത്തെ വയസ്സില് അന്നത്തെ പ്രമുഖ നാടകക്കമ്പനിയായ പ്രതിഭ ആര്ട്ട്സിന്റെ നാടകങ്ങളില് ഗായികയായാണ് കലാരംഗത്തു വരുന്നത്. കെ പി എ സിയുടെ മൂലധനം എന്ന നാടകത്തിലൂടെ നാടകരംഗത്തെത്തി. ശ്രീരാമ പട്ടാഭിഷേകം എന്ന സിനിമയില് ആണ് ആദ്യമായി കാമറക്കു മുമ്പില് എത്തുന്നത്.
പത്തനംതിട്ട ജില്ലയിലെ കവിയൂര് ആണ് പൊന്നമ്മ ജനിച്ചത്. ടി.പി ദാമോദരന്റെയും ഗൗരിയുടെയും മൂത്തമകളായിരുന്നു. നിര്മാതാവും സംവിധായകനുമായ മണിസ്വാമിയെ 1969ല് വിവാഹം കഴിച്ചു. ഏകമകള് ബിന്ദു കുടുംബസമേതം അമേരിക്കയിലാണ് താമസം.
