ആടിയും പാടിയും ആര്‍ത്തുല്ലസിച്ചു. കൂടെ ഭിന്നശേഷി ഇന്‍ക്ലൂസീവ് കലോത്സവം
കൊയിലാണ്ടി: സമഗ്ര ശിക്ഷാ കേരള ബി ആര്‍ സി പന്തലായനി ഭിന്നശേഷി മാസാചരണത്തിന്റെ ഭാഗമായി ‘കൂടെ’ ഇന്‍ക്ലൂസീവ് കലോത്സവം നടത്തി. ഇന്‍ക്ലൂസീവ് കലോത്സവത്തിന്റെ ഉദ്ഘാടനം കാനത്തില്‍ ജമീല എംഎല്‍എ നിര്‍വഹിച്ചു.
നഗരസഭ ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ കെ ഷിജു അധ്യക്ഷത വഹിച്ചു. പന്തലായനി ബി ആര്‍ സി പരിധിയിലെ 60 കുട്ടികളും രക്ഷിതാക്കളും ബിആര്‍ സി അംഗങ്ങളും പൊതുജനങ്ങളും ആഘോഷത്തില്‍ പങ്കുചേര്‍ന്നു .
ബി ആര്‍ സി പന്തലായനി ഒരുക്കിയ സ്വാഗത ഗാനത്തോടെ തുടങ്ങിയ ചടങ്ങിനു ശേഷം കുട്ടികളുടെ വിവിധ കലാപരിപാടികള്‍ അരങ്ങേറി. രുചികരമായ ഉച്ചഭക്ഷണവും കുട്ടികള്‍ക്കായി ഒരുക്കിയിരുന്നു.
കലോത്സവ വേദിയില്‍ എംഎല്‍എയോടൊപ്പം കേക്ക് മുറിച്ച് ക്രിസ്തുമസ് പുതുവത്സര ആഘോഷങ്ങളില്‍ കുട്ടികള്‍ ഭാഗമായി. കലോത്സവത്തില്‍ പങ്കെടുത്ത മുഴുവന്‍ കുട്ടികള്‍ക്കും സമ്മാനങ്ങള്‍ നല്‍കി.
ചടങ്ങില്‍ ബി ആര്‍ സി ട്രെയിനര്‍ ഉണ്ണികൃഷ്ണന്‍, സിആര്‍സി കോഡിനേറ്റര്‍, പന്തലായനി ബിപിസി ഇ പി ദീപ്തി, സ്‌പെഷ്യല്‍ എജ്യുക്കേറ്റര്‍ ബി സില്‍ജ എന്നിവര്‍ സംസാരിച്ചു.
