ചെറുവണ്ണൂരിൽ ഓണസമൃദ്ധി 2023 കർഷക ചന്ത ആരംഭിച്ചു
കാർഷിക വികസന കർഷക ക്ഷേമ വകുപ്പിന്റെ ആഭിമുഖ്യത്തിൽ ചെറുവണ്ണൂർ ഗ്രാമപഞ്ചായത്ത് കൃഷിഭവന്റെ ഓണസമൃതി 2023 കർഷക ചന്തയുടെ ഉദ്ഘാടനം ഗ്രാമ പഞ്ചായത്ത് പ്രസിഡന്റ് എൻ.ടി. ഷിജിത്ത് നിർവഹിച്ചു. ചെറുവണ്ണൂർ കൃഷി ഭവൻ ഗ്രാമശ്രീ പച്ചക്കറി ക്ലസ്റ്ററിന്റെ കെട്ടിടത്തിൽ നടന്ന പരിപാടിയിൽ വികസന കാര്യ സ്റ്റാൻഡിംഗ് കമ്മിറ്റി ചെയർമാൻ എൻ.ആർ രാഘവൻ അധ്യക്ഷത വഹിച്ചു.
കൃഷി ഓഫീസർ ഷബീർ അഹമ്മദ് കെ.എ സ്വാഗതം പറഞ്ഞു. ചടങ്ങിൽ ക്ഷേമ കാര്യ സ്റ്റാന്റിംഗ് കമ്മിറ്റി ചെയർപേഴ്സൺ പി. മോനിഷ, പഞ്ചായത്ത് അംഗങ്ങളായ എ. ബാലകൃഷ്ണൻ, എ.കെ ഉമ്മർ, കൃഷി അസിസ്റ്റന്റുമാരായ വി.സുധ, യൂസഫ് തുപ്പിലിക്കാടൻ, പി.കെ സുധീപ് എന്നിവർ പങ്കെടുത്തു.
സർക്കാരിന്റെ വിപണി ഇടപെടൽ നടപടികളുടെ ഭാഗമായി ഓണ വിപണി ലക്ഷ്യമിട്ടാണ് കർഷക ചന്ത ആരംഭിച്ചത്. കൃഷിവകുപ്പിനൊപ്പം ഹോർട്ടികോർപ്പും വി.എഫ്.പി.സി.കെയും സംയുക്തമായാണ് വിപണി സംഘടിപ്പിക്കുന്നത്. പൊതു വിപണി വിലയേക്കാൾ കുറവിൽ ചന്തയിൽ പച്ചക്കറികൾ വിൽപ്പനയ്ക്കുണ്ട്. ആഗസ്റ്റ് 28 വരെയാണ് ചന്ത പ്രവർത്തിക്കുക.
