ബൊലേറോ നിയന്ത്രണം വിട്ട് മറിഞ്ഞ് ഗര്ഭിണിയും കുഞ്ഞുമടക്കം അഞ്ചോളം പേര്ക്ക് പരുക്ക്
കൊയിലാണ്ടി: തിക്കോടിയില് ബൊലേറോ നിയന്ത്രണം വിട്ട് മറിഞ്ഞ് ഗര്ഭിണിയും കുഞ്ഞുമടക്കം അഞ്ചോളം പേര്ക്ക് പരുക്ക്. വടകര ഭാഗത്ത് നിന്ന് വരികയായിരുന്ന ബൊലേറോ പോക്കറ്റ് റോഡില് നിന്ന് കയറിയ കാറിനെ രക്ഷപ്പെടുത്താനുള്ള ശ്രമത്തിനിടെ നിയന്ത്രണം വിട്ട് ദേശീയപാത ഭിത്തിയിലിടിച്ച് മറിയുകയായിരുന്നു. ഇന്ന് ഉച്ചയ്ക്ക് 1.30 ഓടെയാണ് അപകടം.
പൂര്ണ ഗര്ഭിണിയായ യുവതിയുമായി പ്രസവവുമായി ബന്ധപ്പെട്ട് കോഴിക്കോട് ആശുപത്രിയിലേക്ക് പോവുകയായിരുന്നു ബൊലേറോ ജീപ്പ്. ഇതിനിടെ, തിക്കോടി മീത്തലെ പള്ളി പറോളി നട റോഡില് നിന്നും കയറി വന്ന കാറിനെ രക്ഷപ്പെടുത്താനുള്ള ശ്രമത്തിനിടെയാണ് അപകടം. രണ്ട് തവണ കീഴ്മേല് മറിയുകയായിരുന്നു. പരുക്കേറ്റവരെ ഉടന് ആശുപത്രിയിലേക്ക് മാറ്റി. പയ്യോളി പോലീസ് സ്ഥലത്തെത്തി. വടകര താഴെ അങ്ങാടി സ്വദേശികള്ക്കാണ് പരിക്കേറ്റത്.
