തദ്ദേശ തെരഞ്ഞെടുപ്പ് വിജ്ഞാപനം നാളെ, രാവിലെ 11 മുതല് നാമനിര്ദേശ പത്രിക സമര്പ്പിക്കാം
കോഴിക്കോട്: തദ്ദേശ സ്വയംഭരണ സ്ഥാപനങ്ങളിലേക്കുള്ള പൊതുതിരഞ്ഞെടുപ്പിന്റെ വിജ്ഞാപനം സംസ്ഥാന തിരഞ്ഞെടുപ്പ് കമീഷന് 14-11-2025 പുറപ്പെടുവിക്കും. ഇതോടൊപ്പം അതത് വരണാധികാരികള് തിരഞ്ഞെടുപ്പ് പൊതുനോട്ടീസ് പരസ്യപ്പെടുത്തും. രാവിലെ 11നും വൈകിട്ട് മൂന്നിനും ഇടയിലാണ് പത്രിക സമര്പ്പിക്കേണ്ടത്. പത്രിക സമര്പ്പിക്കാനുള്ള അവസാന തീയതി നവംബര് 21. നാമനിര്ദേശ പത്രികകളുടെ സൂക്ഷ്മ പരിശോധന നവംബര് 22ന് നടക്കും. പത്രിക പിന്വലിക്കാനുള്ള അവസാന തീയതി നവംബര് 24.
സ്ഥാനാര്ഥിക്ക് നേരിട്ടോ തന്റെ നിര്ദേശകന് വഴിയോ പൊതുനോട്ടീസില് നിര്ദേശിച്ച സ്ഥലത്ത് നാമനിര്ദേശ പത്രിക (ഫോറം 2) സമര്പ്പിക്കാം. സ്ഥാനാര്ഥി ആ തദ്ദേശ സ്ഥാപനത്തിലെ ഏതെങ്കിലും വാര്ഡിലെ വോട്ടറായിരിക്കണം. നാമനിര്ദേശ പത്രിക സമര്പ്പിക്കുന്ന തീയതിയില് 21 വയസ്സ് പൂര്ത്തിയായിരിക്കുകയും വേണം. സ്ഥാനാര്ഥിയെ നാമനിര്ദേശം ചെയ്യുന്ന വ്യക്തി അതേ വാര്ഡിലെ തന്നെ വോട്ടറായിരിക്കണം. ഒരു സ്ഥാനാര്ത്ഥിക്ക് 3 സെറ്റ് പത്രിക സമര്പ്പിക്കാം.
സംവരണ സീറ്റുകളില് മത്സരിക്കുന്നവര് ആ വിഭാഗത്തില്പ്പെട്ടവരായിരിക്കണം. പട്ടികജാതി, പട്ടികവര്ഗ സംവരണ വാര്ഡുകളില് മത്സരിക്കുന്നവര് അധികാരപ്പെട്ട ഉദ്യോഗസ്ഥനില്നിന്നുള്ള ജാതി സര്ട്ടിഫിക്കറ്റ് ഹാജരാക്കണം.
ഗ്രാമപഞ്ചായത്തിലേക്ക് മത്സരിക്കുന്നവര് 2000 രൂപയും ബ്ലോക്ക് പഞ്ചായത്ത്, നഗരസഭ എന്നിവിടങ്ങളിലെ സ്ഥാനാര്ഥികള് 4000 രൂപയും ജില്ലാപഞ്ചായത്ത്, കോര്പ്പറേഷന് എന്നിവിടങ്ങളില് 5000 രൂപയുമാണ് നാമനിര്ദേശ പത്രികയോടൊപ്പം കെട്ടിവെക്കേണ്ടത്. പട്ടികജാതി, പട്ടികവര്ഗ വിഭാഗങ്ങള്ക്ക് തുകയുടെ പകുതി മതി.
സ്ഥാനാര്ഥിയുടെ വിദ്യാഭ്യാസ യോഗ്യത, പത്രിക സമര്പ്പിക്കുന്ന സമയത്ത് സ്ഥാനാര്ഥി ഉള്പ്പെട്ട ക്രിമിനല് കേസുകള്, സ്ഥാനാര്ഥിയുടെയും കുടുംബാംഗങ്ങളുടെയും ആസ്തിയും ബാധ്യതയും സര്ക്കാറിനോ ഏതെങ്കിലും തദ്ദേശ സ്ഥാപനത്തിനോ നല്കാനുള്ള കുടിശ്ശിക, അയോഗ്യതയുണ്ടെങ്കില് അക്കാര്യം തുടങ്ങിയ വിവരങ്ങള് പത്രികയോടൊപ്പം ഫോറം 2എ യില് സമര്പ്പിക്കണം.
ഒരാള് ഒരു തദ്ദേശസ്ഥാപനത്തിലെ ഒരു വാര്ഡില് മാത്രമേ മത്സരിക്കാന് പാടുള്ളൂ. ഒന്നില് കൂടുതല് വാര്ഡുകളില് പത്രിക നല്കിയാല് എല്ലാം നിരസിക്കും. എന്നാല്, ത്രിതല പഞ്ചായത്തുകളില് വ്യത്യസ്ത തലങ്ങളില് മത്സരിക്കാവുന്നതാണ്.
നാമനിര്ദേശ പത്രികയും 2എ ഫോറവും പൂര്ണമായി പൂരിപ്പിച്ചിട്ടുണ്ടെന്ന് സ്ഥാനാര്ഥികള് ഉറപ്പാക്കണം. ഭേദഗതി ചെയ്ത ഫോറങ്ങള് കമീഷന്റെ വെബ്സൈറ്റില് ലഭ്യമാണ്. സ്ഥാനാര്ഥികള് വരണാധികാരി മുമ്പാകെയോ അധികാരപ്പെട്ട ഉദ്യോഗസ്ഥര് മുമ്പാകെയോ നിയമപ്രകാരം സത്യപ്രതിജ്ഞയോ ദൃഢപ്രതിജ്ഞയോ ചെയ്ത് നിശ്ചിത ഫോറത്തില് ഒപ്പുവച്ച് പത്രികയോടൊപ്പം സമര്പ്പിക്കണം. സ്ഥാനാര്ഥിയുടെ യോഗ്യതയും അയോഗ്യതയും സംബന്ധിച്ച് വരണാധികാരിയുടെ തീരുമാനം അന്തിമമായിരിക്കും.
