മണക്കുളങ്ങര ക്ഷേത്രോത്സവത്തില് ആന ഇടഞ്ഞ സംഭവം; പീതാംബരന് എന്ന ആന മദപ്പാടില് ആയിരുന്നു എന്ന് റിപ്പോര്ട്ട്
കൊയിലാണ്ടി: ക്ഷേത്രോത്സവത്തില് ആന ഇടഞ്ഞ സംഭവത്തില് സോഷ്യല് ഫോറസ്ട്രി കണ്സര്വേറ്റര് അന്തിമ റിപ്പോര്ട്ട് സമര്പ്പിച്ചു. ചട്ട വിരുദ്ധമായി പടക്കം പൊട്ടിച്ചതും ആനകളുടെ കാലില് ചങ്ങല ഇല്ലാതിരുന്നതും അപകടത്തിന് വഴി വെച്ചതായാണ് റിപ്പോര്ട്ടിലുള്ളത്. ഇത്തരം സംഭവങ്ങള് ആവര്ത്തിക്കാതിരിക്കാന് 6 നിര്ദ്ദേശങ്ങളും റിപ്പോര്ട്ടിലുണ്ട്. സംഭവ ദിവസം പീതാംബരന് എന്ന ആന മദപ്പാടില് ആയിരുന്നു എന്നും റിപ്പോര്ട്ടില് പറയുന്നു.
ഫെബ്രുവരി 13ന് വൈകിട്ട് ആറ് മണിയോടൊയിരുന്നു കൊയിലാണ്ടി മണക്കുളങ്ങര ഭഗവതീ ക്ഷേത്തില് കേട്ടുകേള്വിയില്ലാത്ത വിധമുളള ദുരന്തം അരങ്ങേറിയത്. ഉത്സവത്തിന്റെ അവസാന ദിവസത്തെ ചടങ്ങുകളുടെ ഭാഗമായുളള വരവിനായി ആനകളെ തിടമ്പേറ്റുമ്പോഴായിരുന്നു അപകടം. ഗുരുവായൂര് ദേവസ്വത്തിന് കീഴിലുളള പീതാംബരന്, ഗോകുല് എന്നീ ആനകളാണ് ഇടഞ്ഞത്. വരവിന് മുന്നോടിയായി കതിന പൊട്ടിച്ചതോടെ വിരണ്ട പീതാംബരന് ഗോകുലിനെ കുത്തുകയായിരുന്നു.
