കേരളത്തിലെ സ്വകാര്യസ്ഥാപനങ്ങളില് ഒഴിവുകള്; നോര്ക്ക നെയിം പദ്ധതിയിലൂടെ തിരിച്ചെത്തിയ പ്രവാസികള്ക്ക് അപേക്ഷിക്കാം
സംസ്ഥാനത്തെ സ്വകാര്യ സ്ഥാപനങ്ങളില് ഒഴിവുളള വിവിധ തസ്തികകളിലേക്ക് തിരിച്ചെത്തിയ പ്രവാസികളിൽ നിന്നും സംസ്ഥാന സര്ക്കാര് സ്ഥാപനമായ നോര്ക്ക റൂട്ട്സ് മുഖേന അപേക്ഷ ക്ഷണിച്ചു. ഓട്ടോമൊബൈല്, എംഎസ്എംഇ, ധനകാര്യം, ഫാര്മര് പ്രൊഡ്യൂസര് കമ്പനി, മാന്പവര് സ്ഥാപനം എന്നിവയില് തിരുവനന്തപുരം, കൊല്ലം, തൃശ്ശൂര്, കോഴിക്കോട് ജില്ലകളിലാണ് ഒഴിവുകള്.
തിരിച്ചെത്തിയ പ്രവാസി കേരളീയര്ക്ക് നാട്ടിലെ സംരംഭങ്ങളിൽ തൊഴിൽ ലഭ്യമാക്കുന്നതിന് ലക്ഷ്യമിട്ട് സര്ക്കാര് നോര്ക്ക റൂട്ട്സ് മുഖേന നടപ്പിലാക്കുന്ന പുതിയ പ്രവാസി പുനരധിവാസ പദ്ധതിയായ നോർക്ക അസിസ്റ്റഡ് & മൊബിലൈസ്ഡ് എംപ്ലോയ്മെന്റ് അഥവ ‘നെയിം’ പദ്ധതിപ്രകാരമാണ് അപേക്ഷ ക്ഷണിച്ചത്. നോര്ക്ക റൂട്ട്സിന്റെ വെബ്ബ്സൈറ്റ് (www.norkaroots.org) സന്ദര്ശിച്ച് ജനുവരി 31 നകം അപേക്ഷ നല്കാം. വിശദ വിജ്ഞാപനവും ഓരോ തസ്തികകളിലേയും യോഗ്യത സംബന്ധിക്കുന്ന വിവരങ്ങളും വെബ്ബ്സൈറ്റില് ലഭ്യമാണ്.
കൂടുതൽ വിവരങ്ങൾക്ക് 0471-2770523 നമ്പറിൽ (പ്രവ്യത്തി ദിവസങ്ങളില്, ഓഫീസ് സമയത്ത്) ബന്ധപ്പെടാം.
രണ്ടു വര്ഷത്തിലധികം വിദേശരാജ്യത്ത് ജോലി ചെയ്തശേഷം നാട്ടില് തിരിച്ചെത്തി ആറു മാസം കഴിഞ്ഞ, സാധുവായ വിസ ഇല്ലാത്ത പ്രവാസികൾക്കാണ് അപേക്ഷിക്കാന് കഴിയുക. പ്രവാസികളെ നിയമിക്കുന്ന തൊഴിലുടമയ്ക്ക് (എംപ്ലോയർ) നിബന്ധനകളുടെ അടിസ്ഥാനത്തിൽ ഒരു വര്ഷത്തേയ്ക്ക് പരമാവധി 100 ദിനങ്ങളിലെ ശമ്പളവിഹിതം (വേജ് കോമ്പന്സേഷന്) പദ്ധതി വഴി ലഭിക്കും.
ഒരു സ്ഥാപനത്തിന് പരമാവധി 50 പേരെ വരെ ശമ്പളവിഹിതം ലഭ്യമാക്കി നെയിം പദ്ധതിപ്രകാരം നിയമിക്കാനാകും. പ്രവാസികളുടെ തൊഴില് നൈപുണ്യവും അനുഭവപരിചയവും സംരംഭങ്ങൾക്ക് പ്രയോജനകരമാകുന്നതിനൊപ്പം തിരികെയെത്തിയ പ്രവാസികൾക്ക് കൂടുതൽ തൊഴിലവസരങ്ങള് ലഭ്യമാക്കുന്നതിനാണ് നെയിം പദ്ധതി.
കൂടുതല് വിവരങ്ങള്ക്ക് 24 മണിക്കൂറും പ്രവര്ത്തിക്കുന്ന നോര്ക്ക ഗ്ലോബല് കോണ്ടാക്ട് സെന്ററിന്റെ ടോള് ഫ്രീ നമ്പറുകളായ 1800 425 3939 (ഇന്ത്യയില് നിന്നും) +91-8802 012 345 (വിദേശത്തുനിന്നും, മിസ്ഡ് കോള് സര്വീസ്) ബന്ധപ്പെടാം.
കൗണ്സിലര്മാരെ നിയമിക്കുന്നു
ഫിഷറീസ് വകുപ്പിന്റെ പദ്ധതിപ്രകാരം ഗവ. ഫിഷറീസ് ടെക്നിക്കല് ഹൈസ്കൂളുകളിൽ പഠിക്കുന്ന, മത്സ്യത്തൊഴിലാളികളുടെ മക്കൾക്ക് കൗണ്സിലിംഗ് സേവനം നൽകാനായി അഞ്ചു കൗണ്സിലര്മാരെ താൽക്കാലികമായി നിയമിക്കുന്നു. അധ്യയന കാലത്ത് സ്കൂളിലും ഒഴിവുസമയത്ത് ഓണ്ലൈന്/ഭവന സന്ദര്ശനം/സ്കൂള് ക്യാമ്പുകള് എന്നിവ മുഖേനയും കൃത്യമായ മാര്ഗരേഖയിലൂടെ കട്ടികളുടെ സമഗ്ര വ്യക്തിത്വ വികസനം ലക്ഷ്യമാക്കി വര്ഷം മുഴുവന് പ്രവര്ത്തിക്കാന് താല്പര്യമുള്ള,
യോഗ്യതയുളളവരെയാണ് വേണ്ടത്.
മാസം 27000 രൂപയാണ് വേതനം. അപേക്ഷ സ്വീകരിക്കുന്ന അവസാന തീയതി ജനുവരി 27 ന് വൈകീട്ട് അഞ്ച് മണി. പരീക്ഷ/സ്ക്രീന് ടെസ്റ്റ്/അഭിമുഖം, അസല് സാക്ഷ്യപത്രങ്ങളുടെ പരിശോധന എന്നിവ തിരുവനന്തപുരത്തെ ഫീഷറീസ് ആസ്ഥാന ഓഫീസിൽ നടത്തും. പ്രായം 25 നും 45 നും ഇടയില്.
യോഗ്യത: മനഃശാസ്ത്രം/കൗണ്സിലിംഗില് പിജി അല്ലെങ്കില് ക്ലിനിക്കല് സൈക്കോളജി അല്ലെങ്കില് എംഎസ്ഡബ്ല്യൂ (മെഡിക്കല് ആന്റ് സൈക്യാട്രി), സര്ക്കാര് മേഖലയില് കൗണ്സിലിംഗ് നടത്തിയിട്ടുള്ള മൂന്ന് വര്ഷത്തെ പ്രവര്ത്തി പരിചയം, മത്സ്യത്തൊഴിലാളികളുടെ മക്കള്ക്ക്/മേഖലയില് നിന്നുള്ളവര്ക്ക് മുന്ഗണന.
കൂടുതല് വിവരങ്ങള്ക്ക് (https://fisheries.kerala.gov.in), ഫോണ്: 0471-2305042.
അപേക്ഷ ക്ഷണിച്ചു
കേരള സർക്കാരിന്റെ ഉന്നത വിദ്യാഭ്യാസ വകുപ്പിനുകീഴിൽ പ്രവർത്തിക്കുന്ന അസാപ് കേരളയിലൂടെ കേരള ലാൻഡ് ഡെവലപ്മെന്റ് കോർപ്പറേഷൻ (കെഎൽഡിസി) യിൽ ഗ്രാജുവേറ്റ് ഇന്റേൺ തസ്തികയിലേക്ക് അപേക്ഷ ക്ഷണിച്ചു. സിവിൽ എഞ്ചിനീയറിംഗ് ബിരുദധാരികൾക്ക് അപേക്ഷിക്കാം.
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് എന്നീ ജില്ലകളിലായാണ് അവസരങ്ങളുള്ളത്. 2025 ജനുവരി 25 ന് വൈകുന്നേരം അഞ്ചു മണിക്ക് മുമ്പായി ഓൺലൈനായി അപേക്ഷ സമർപ്പിക്കണം. കൂടുതൽ വിവരങ്ങൾക്കും അപേക്ഷ സമർപ്പിക്കുന്നതിനും https://connect.asapkerala.gov.in/events/14339 എന്ന ലിങ്ക് സന്ദർശിക്കുക. അപേക്ഷ ഫീസ് 500 രൂപ.
