തിരുവനന്തപുരം ജിവി രാജ സ്പോട്സ് സ്കൂള്‍, കണ്ണൂര്‍ സ്പോട്സ് സ്കൂള്‍, തൃശൂര്‍ സ്പോട്സ് ഡിവിഷന്‍ഫുട്‌ബോള്‍ സെലക്ഷന് മെയ് മൂന്നു മുതല്‍
തിരുവനന്തപുരം: തിരുവനന്തപുരം ജിവി രാജ സ്പോട്സ് സ്കൂള്‍, കണ്ണൂര്‍ സ്പോട്സ് സ്കൂള്‍, തൃശൂര്‍ സ്പോട്സ് ഡിവിഷന്‍ എന്നിവിടങ്ങളിലേക്കുള്ള 2023-24 അധ്യയനവര്‍ഷത്തെ ഫുട്ബോള് കളിക്കാരുടെ സെലക്ഷന് മൂന്നു മുതല്‍ വിവിധ കേന്ദ്രങ്ങളിലായി നടത്തും. തിരുവനന്തപുരം ജിവി രാജ സ്പോട്സ് സ്കൂളിലേക്ക് എട്ട്, പ്ലസ് വണ്‍ ക്ലാസുകളിലായി ആണ്‍കുട്ടികള്‍ക്കു മാത്രമാണ് സെലക്ഷന്.
കണ്ണൂര്‍ സ്പോട്സ് സ്കൂളില്‍ എട്ട്, പ്ലസ് വണ്‍ ക്ലാസുകളിലേക്ക് പെണ്‍കുട്ടികള്‍ക്കു മാത്രവും തൃശൂര്‍ സ്പോട്സ് ഡിവിഷനില്‍ എട്ടാം ക്ലാസില്‍ ആണ്‍കുട്ടികള്‍ക്കു മാത്രവുമാണ് സെലക്ഷന്. പ്ലസ് വണ്‍ പ്രവേശനത്തിനുള്ള ആണ്‍കുട്ടികള്‍ ജില്ലയെ പ്രതിനിധീകരിച്ച്‌ സംസ്ഥാനതല മത്സരങ്ങളില്‍ പങ്കെടുത്തവരും എട്ടാം ക്ലാസിലേക്കുള്ള പ്രവേശനത്തിന് സ്കൂള്‍ സബ് ജില്ലയെ പ്രതിനിധീകരിച്ചു ജില്ലാമത്സരത്തിലെങ്കിലും പങ്കെടുത്തവരുമായിരിക്കണം. പെണ്‍കുട്ടികള്‍ക്ക് സബ്ജില്ലാ-ജില്ലാ പ്രാതിനിധ്യം ബാധകമല്ല.
മൂന്നിന് തിരുവനന്തപുരം മൈലം ജി വി രാജ സ്പോട്സ് സ്കൂള്‍, അഞ്ചിന് എറണാകുളം മഹാരാജാസ് കോളജ് ഗ്രൗണ്ട്, എട്ടിന് തേഞ്ഞിപ്പലം കാലിക്കട്ട് യൂണിവേഴ്സിറ്റി സ്റ്റേഡിയം, പത്തിന് കണ്ണൂര്‍ പോലീസ് ഗ്രൗണ്ട് എന്നിവിടങ്ങളിലാണു സെലക്ഷന് നടക്കുന്നത്. സെലക്‌ഷനില്‍ പങ്കെടുക്കുന്ന വിദ്യാര്‍ഥികള്‍ വയസ് തെളിയിക്കുന്ന സര്‍ട്ടിഫിക്കറ്റ്, കായിക മികവ് തെളിയിക്കുന്ന സര്‍ട്ടിഫിക്കറ്റ്, രണ്ടു പാസ്പോര്‍ട് സൈസ് ഫോട്ടോ, സ്പോട്സ് കിറ്റ് എന്നിവ സഹിതം രാവിലെ ഒന്പതിന് സെന്‍ററില്‍ എത്തിച്ചേരണം.
