ബാലാവകാശ നിയമ സാക്ഷരതക്ക് മുന്തൂക്കം നല്കണം : മന്ത്രി മുഹമ്മദ് റിയാസ്
സംസ്ഥാനത്ത് ബലവകാശ നിയമ സാക്ഷരതക്ക് മുന്കൈ എടുക്കണമെന്ന് ടൂറിസം – പൊതുമരാമത്ത് വകുപ്പ് മന്ത്രി പി എ മുഹമ്മദ് റിയാസ്. സാക്ഷരത വ്യാപകമാക്കിയാല് മാത്രമേ നിയമ രൂപീകരണലക്ഷ്യം കൈവരിക്കാനാകൂവെന്നും മന്ത്രി പറഞ്ഞു. നിയമത്തിന്റെ സാങ്കേകത്വങ്ങള് ലളിതമായ രീതിയില് ജനങ്ങളെ പഠിപ്പിക്കണം. ഈ പ്രക്രീയയില് ജനപ്രതിനിധികള്ക്ക് മുഖ്യ പങ്ക് വഹിക്കാനാകും. ജനാധിപത്യ മതേതരത്വ മൂല്യങ്ങളും കുട്ടികളിലേക്ക് പകരേണ്ടതുണ്ട്. ശൈശവം മുതല്ക്കേ മതനിരപേക്ഷാ ബോധ്യവും കുട്ടികളില് വളര്ത്താനാകണം. ജനാധിപത്യ അവകാശ ബോധം ഓരോ പൗരനിലേക്കും എത്തിക്കുന്നത് പോലെ കുട്ടികളില് ജനാധിപത്യബോധ്യം പകരുന്നതിനു പ്രാധാന്യം നല്കണമെന്നും മന്ത്രി വ്യക്തമാക്കി.
സംസ്ഥാന ബാലാവകാശ സംരക്ഷണ കമ്മിഷനും യുണീസെഫും സംയുക്തമായി സംഘടിപ്പിച്ച നിയമസഭാ സാമാജികരുടെയും നയ രൂപീകരണത്തെ സ്വാധീനിക്കുന്നവരുടെയും സംസ്ഥാനതല കൂടിയാലോചനയോഗത്തിന്റെ ഉദ്ഘാടനം ഹോട്ടല് വിവാന്തയില് നിര്വ്വഹിക്കുകയായിരുന്നു മന്ത്രി. ശ്രദ്ധയും സംരക്ഷണവും ആവശ്യമുള്ളതും നിയമവുമായി പൊരുത്തപ്പെടാത്തതുമായ കുട്ടികളുടെ സമഗ്ര വികസനം ഉറപ്പാക്കുന്നതിന് നിരന്തര ഇടപെടലുകള് കമ്മിഷന് നടത്തിവരുന്നതിന്റെ ഭാഗമായാണ് പരിപാടി സംഘടിപ്പിച്ചത്.
കുട്ടികളുടെ താല്പര്യങ്ങള് പരിഗണിക്കുകയും അനിവാര്യമായവ നിറവേറ്റപ്പെടുകയും ചെയ്യുന്ന ഒരു ശിശുസൗഹൃദ ഭരണ മാതൃക ഉറപ്പാക്കപ്പെടുകയാണ് കമ്മിഷന്റെ ലക്ഷ്യം. കുട്ടികളുടെ അവകാശ സംരക്ഷണത്തിനും ഉന്നമനത്തിനുമുള്ള നൂതന മാര്ഗ്ഗങ്ങള് ചര്ച്ചചെയ്യുന്നതിനും കുട്ടികളുമായി ബന്ധപ്പെട്ട നിയമങ്ങളും നയപരിപാടികളും കൂടുതല് വിലയിരുത്തുന്നതിനും ശിശുസൗഹൃദ തദ്ദേശ ഭരണം, തദ്ദേശ സ്വയംഭരണ സ്ഥാപനങ്ങളുടെ പദ്ധതിയില് കുട്ടികളുമായി ബന്ധപ്പെട്ടവയ്ക്ക് മുന്ഗണന നല്കേണ്ടതിന്റെ ആവശ്യകത, കുട്ടികളുടെ അവകാശങ്ങള് സംരക്ഷിക്കുന്നതില് നിലവിലുള്ള നിയമങ്ങള് പര്യാപതമാണോ തുടങ്ങിയ വിഷയങ്ങള് യോഗം ചര്ച്ച ചെയ്തു.
