മാലിന്യ മുക്ത നവകേരളം ജനകീയ ക്യാമ്പയിന് നഗരസഭ തല ജനകീയ സംഘാടന സമിതി രൂപീകരിച്ചു
കൊയിലാണ്ടി: മാലിന്യമുക്തം നവകേരളം രണ്ടാംഘട്ട ക്യാമ്പയിന് ജനകീയമായി നടത്തുന്നതിന്റെ ഭാഗമായി കൊയിലാണ്ടി നഗരസഭ തല ജനകീയ സംഘാടക സമിതി രൂപീകരിച്ചു. ഇ എം എസ് ടൗണ് ഹാളില് നഗരസഭ ചെയര്പേഴ്സന് സുധ കിഴക്കെപ്പാട്ട് ഉദ്ഘാടനം ചെയ്തു. നഗരസഭ വൈ. ചെയര്മാന് അഡ്വ കെ സത്യന് അദ്ധ്യക്ഷത വഹിച്ച് സംസാരിച്ചു.
2024 ഒക്ടോബര് 2 ഗാന്ധിജയന്തി ദിനം മുതല് 2025 മാര്ച്ച് 30 സീറോ വേസ്റ്റ് ദിനം വരെ നീണ്ടുനില്ക്കുന്ന രണ്ടാംഘട്ട പ്രവര്ത്തനങ്ങളില് മാലിന്യ പരിപാലനത്തില് സുസ്ഥിരത കൈവരിക്കാനും സമ്പൂര്ണ്ണമാക്കാനുമാണ് ലക്ഷ്യമിടുന്നത്.
ഹരിത കേരള മിഷന് ജില്ലാ കോ- ഓര്ഡിനേറ്റര് പി.ടി പ്രസാദ് ക്യാമ്പയിന് അവതരണം നടത്തി. എ സുധാകരന് (ജില്ലാ ആസൂത്രണ സമിതി മെമ്പര്) നഗരസഭ തല പദ്ധതി അവതരിപ്പിച്ചു സംസാരിച്ചു. ജുലൈ , ആഗസ്റ്റ് മാസങ്ങളില് വാര്ഡുകളില് മികച്ച പ്രവര്ത്തനം നടത്തിയ ഹരിത കര്മ്മസേനാംഗങ്ങളെ ശുചിത്വ മിഷന് ജില്ലാ കോഓര്ഡിനേറ്റര് ഗൗതമന് KAS ആദരിച്ചു.
കൃത്യമായ അജൈവ-ജൈവമാലിന്യ സംസ്കരണ സംവിധാന ഒരുക്കുക, ഹരിത കര്മ്മസേനയെ ശക്തി പ്പെടുത്തുക, ശുചിത്വ സുന്ദരമായ ടൗണുകള് പാതയോരങ്ങള്, മാലിന്യമുക്തമായ ജലസ്രോതസ്സുകള്, ഹരിത അയല്കൂട്ടങ്ങള്, ഹരിത റസിഡന്സുകള്,ഹരിത വിദ്യാലയങ്ങള്,ഹരിത അങ്കണവാടികള്,ഹരിത ഓഫീസുകള്,ഹരിത ടൂറിസം കേന്ദ്രങ്ങള് എന്നിങ്ങനെയാണ് പരിപാടിയില് ലക്ഷ്യമിടുന്നത്. മാലിന്യ പരിപാലനത്തിന് വിരുദ്ധമായി പ്രവൃത്തിക്കുന്നവര്ക്കെതിരെ നിയമനടപടികള് സ്വീകരിക്കും. സമ്പൂര്ണ്ണ മാലിന്യ മുക്ത നഗരസഭയായി പ്രഖ്യാപിക്കുന്നതിന് 180 ദിവസത്തെ കര്മ്മ പരിപാടിയാണ് നഗരസഭ ആസൂത്രണം ചെയ്തത്. നഗരസഭ തല സംഘാടക സമിതി കൃത്യമായ ഇടവേളകളില് ചേര്ന്ന് കര്മ്മപരിപാടിയുടെ പുരോഗതി അവലോകനം നടത്തും.
ആരോഗ്യ സ്ഥിരം സമിതി ചെയര്പേഴ്സന് സി. പ്രജില യോഗത്തില് സ്വാഗതം പറഞ്ഞു. നഗരസഭ സ്ഥിരം സമിതി അധ്യക്ഷന്മാരായ കെ. ഇ. ഇന്ദിര, ഇ കെ അജിത്ത്, നിജില പറവക്കൊടി കൗണ്സിലര്മാരായ പി. രക്നവല്ലി . വി.പി ഇബ്രാഹിം കുട്ടി, കെ. കെ. വൈശാഖ് എന്നിവര് സംസാരിച്ചു. നഗരസഭ ക്ലീന് സിറ്റി മാനേജര് ടി.കെ സതീഷ് കുമാര് മാലിന്യമുക്ത പ്രതിജ്ഞ ചൊല്ലി കൊടുത്തു. നഗരസഭ സെക്രട്ടറി ഇന്ദു എസ് ശങ്കരി KAS നന്ദി രേഖപ്പെടുത്തി. കൗണ്സിലര്മാര്, ഹരിത കേരള മിഷന് ആര്.പി,ശുചിത്വ മിഷന്, കെ എസ് ഡബ്ല്യു എം.പി എഞ്ചിനിയര്, ഉദ്യോഗസ്ഥര്,വിവിധ രാഷ്ട്രീയപാര്ട്ടി പ്രതിനിധികള്,യുവജന -വിദ്യാര്ത്ഥി -മഹിളാ സംഘടന പ്രതിനിധികള്,വ്യാപാരി വ്യവസായി സംഘടന പ്രതിനിധികള്, അംഗന്വാടി ടീച്ചര്മാര്,റെസിഡന്സ് അസോസിയേഷന് പ്രതിനിധികള്,ഘടക സ്ഥാപന ഉദ്യോഗസ്ഥര് ഹരിത കര്മ്മ സേന ഭാരവാഹികള്,ആശാവര്ക്കര്മാര്,നഗരസഭാ ഉദ്യോഗസ്ഥര് എന്നിവര് യോഗത്തില് പങ്കെടുത്തു.
വീട്ടുമുറ്റ ശുചിത്വ സദസ്സുകള്, ശുചിത്വ പദയാത്രകള്, വീടു കയറിയുള്ള ക്യാമ്പയിനുകള്, പൊതു ഇടങ്ങളിലെ ശുചീകരണം, സ്ഥാപന ശുചീകരണം, ശുചിത്വബോധവല്ക്കരണം പ്രവര്ത്തനങ്ങള്, ബഹുജന ശുചിത്വ സദസ്സുകള്, വിദ്യാലയങ്ങളില് ശുചിത്വ പഠനോത്സവം, നഗരസഭാതല കുട്ടികളുടെ ഹരിത സഭ , നഗരസഭയിലെ മുഴുവന് വീടുകളെയും പങ്കെടുപ്പിച്ചുകൊണ്ട് ശുചിത്വ ഭവനം പദ്ധതി, തുടങ്ങിയ പ്രവര്ത്തനങ്ങള് നഗരസഭയില് നടത്തുന്നതിനും സംഘാടക സമിതിയില് തീരുമാനിച്ചു.
