വയനാട് ജില്ലയിലെ മുണ്ടക്കൈ, ചൂരല്മല ഉരുള്പൊട്ടലിലെ ദുരന്തബാധിതര്ക്കുള്ള അടിയന്തര ധനസഹായം പ്രഖ്യാപിച്ച് സര്ക്കാര്
തിരുവനന്തപുരം: വയനാട് ജില്ലയിലെ മുണ്ടക്കൈ, ചൂരല്മല ഉരുള്പൊട്ടലിലെ ദുരന്തബാധിതര്ക്കുള്ള അടിയന്തര ധനസഹായം പ്രഖ്യാപിച്ച് സര്ക്കാര്. ക്യാമ്പില് കഴിയുന്ന ഓരോ കുടുംബത്തിനും അടിയന്തര ധനസഹായമായി പതിനായിരം രൂപവീതം അനുവദിക്കുമെന്ന് മുഖ്യമന്ത്രി പിണറായി വിജയന് അറിയിച്ചു.
ഉരുള്പൊട്ടലില് വീടും സ്ഥലവും നഷ്ടപ്പെട്ടവര്ക്ക് മറ്റൊരു വാസസ്ഥലത്തേക്ക് മാറുന്നതിന് സംസ്ഥാന സര്ക്കാര് അടിയന്തര സഹായം നല്കും. മുണ്ടക്കൈ, ചൂരല്മല ദുരന്തബാധിതരായ എല്ലാവര്ക്കുമാണ് സഹായം.
ജീവനോപാധി നഷ്ടപ്പെട്ട കുടുംബത്തിലെ പ്രായപൂര്ത്തിയായ ഒരു വ്യക്തിക്ക് 300 രൂപ വീതം ദിവസവും നല്കും. ഇപ്രകാരം, ഒരു കുടുംബത്തിലെ രണ്ട് വ്യക്തികള്ക്കാണ് ഈ ആനുകൂല്യം ലഭ്യമാവുക. കിടപ്പുരോഗികളോ ആശുപത്രിയില് ദീര്ഘനാള് ചികിത്സയില് കഴിയുന്ന രോഗികളോയുള്ള കുടുംബങ്ങള്ക്ക് ഈ ആനുകൂല്യം കുടുംബത്തില് മൂന്ന് പേര്ക്ക് എന്ന നിലയില് നല്കും. 30 ദിവസത്തേക്കാണ് ഈ തുക നല്കുക.
മുണ്ടക്കൈ, ചൂരല്മല പ്രദേശത്തെ ദുരന്തത്തെ തുടര്ന്ന് ക്യാമ്പുകളില് കഴിയുന്നവര്ക്ക് മറ്റൊരു വാസസ്ഥലത്തേക്ക് തിരിച്ചു പോകുമ്പോള് സര്ക്കാര് ഉടമസ്ഥതയിലോ മറ്റു പൊതു ഉടമസ്ഥതയിലോ മാറാന് കഴിയും വിധം താമസ സൗകര്യം ഒരുക്കാനാകുമോ എന്നതില് കളക്ടറുടെ റിപ്പോര്ട്ട് ആവശ്യപെട്ടിട്ടുണ്ട്. കളക്ടറുടെ റിപ്പോര്ട്ട് ലഭിക്കുന്ന മുറയ്ക്ക് വാടക നിശ്ചയിച്ച് അനുവദിക്കും.
