മഴവെള്ളപ്പാച്ചില്‍ കുടുങ്ങിയ കുടുംബങ്ങളെ അഗ്‌നിരക്ഷാസേന ഡിങ്കി ബോട്ടും റോപ്പും ഉപയോഗിച്ച് രക്ഷപ്പെടുത്തി
കൊയിലാണ്ടി: മഴവെള്ളപ്പാച്ചില്‍ കുടുങ്ങിയ കുടുംബങ്ങളെ അഗ്‌നിരക്ഷാസേന ഡിങ്കി ബോട്ടും റോപ്പും ഉപയോഗിച്ച് രക്ഷപ്പെടുത്തി. ഇന്ന് രാവിലെ 10 മണിയോടുകൂടി ഉള്ളേരി പഞ്ചായത്തിലെ ഒറവില്‍, മാതാംതോട് എന്നീ സ്ഥലങ്ങളില്‍ കൊയിലാണ്ടി അഗ്‌നിരക്ഷാസേന എത്തി പുഴയോട് ചേര്‍ന്ന് പ്രദേശങ്ങളില്‍ ഒറ്റപ്പെട്ടു പോയവരെ രക്ഷപ്പെടുത്തിയത്.
വലിയ ഒഴുക്കുള്ളതിനാല്‍ ഏറെ പ്രയാസപ്പെട്ടാണ് പതിനഞ്ചോളം കുടുംബങ്ങളെ രക്ഷപ്പെടുത്തിയത്. ഇതില്‍ 90 ഓളം വയസ്സുള്ള മൂന്നു വൃദ്ധരെയും എട്ടുവയസ്സുള്ള കുട്ടിയും രോഗികളായവരും ഉള്‍പ്പെടുന്ന അമ്പതോളം പേരെ സുരക്ഷിത സ്ഥലത്തു എത്തിച്ചു.
സ്റ്റേഷന്‍ ഓഫീസര്‍ മുരളീധരന്റെ നേതൃത്വത്തില്‍ ഗ്രേഡ് അസിസ്റ്റന്റ് സ്റ്റേഷന്‍ ഓഫീസര്‍മാരായ എം. മജീദ്, ജനാര്‍ദ്ദനന്‍, ഫയര്‍ ആന്‍ഡ് റെസ്‌ക്യൂ ഓഫീസര്‍മാരായ ടി. പി. ഷിജു, ഇ. എം. നിധിപ്രസാദ്, എം. ലിനീഷ് എന്നിവര്‍ രക്ഷാപ്രവര്‍ത്തനത്തില്‍ ഏര്‍പ്പെട്ടു.
