യുവതിയുടെ മരണത്തിനിടയാക്കിയ അരളിപ്പൂവ് നാട്ടിന്‍ പുറങ്ങളില്‍ ധാരാളമായി വളരുന്നു
കേരളത്തില്‍ യുവതിയുടെ മരണത്തിനിടയാക്കിയ അരളിപ്പൂവ് നാട്ടിന്‍ പുറങ്ങളിലും ധാരാളമായി വളരുന്നു. മനോഹരമായ പൂവായതിനാല്‍ റോഡരികിലും പാര്‍ക്കിലും ഗാര്‍ഡനിലുമൊക്കെ പടര്‍ന്നുപിടിച്ച ഈ പൂവ് മരണത്തിനു കാരണമാകും എന്ന വാര്‍ത്ത ഞെട്ടലോടെയാണ് പലരും കേട്ടത്. ജാഗ്രത പാലിക്കണമെന്ന് ആരോഗ്യവിദഗ്ദരും മുന്നറിയിപ്പ് നല്‍കുന്നു.
ചുവപ്പ്, വെളുപ്പ്, പിങ്ക് നിറത്തില്‍ കാണപ്പെടുന്ന അരളിപ്പൂവ് അതിന്റെ ഭംഗികൊണ്ട് തന്നെ ആരെയും ആകര്‍ഷിക്കുന്നതാണ്. ഏതുകാലാവസ്ഥയിലും വളരുമെന്നതാണ് ഇതിന്റെ പ്രത്യേകത. ഭക്തി ആവശ്യങ്ങള്‍ക്കാണ് ഈ പൂവ് അധികമായി ഉപയോഗിക്കുന്നത്
കുട്ടികള്‍ പൂവിന്റെ ഭംഗി കണ്ട് പറിച്ച് അറിയാതെ വായില്‍ വച്ചാല്‍ അപകടമാണ്. റോഡ് സൈഡിലും പാര്‍ക്കുകളിലും പൂന്തോട്ടങ്ങളിലും അരളിച്ചെടികള്‍ ധാരാളമായി ഉണ്ട്. വീടിനു മുമ്പില്‍ ഭംഗിക്കായി അരളിച്ചെടി വളര്‍ത്തുന്നവരുമുണ്ട്.
പുറമെ കാണിക്കുന്ന ഭംഗിക്കപ്പുറം അരളിയുടെ പൂവും തണ്ടും ഇലയും അടക്കം വിഷമയമാണ്. ചെറിയ അളവില്‍ പോലും ഉള്ളില്‍ പോകുന്നത് വലിയ അപകടം ചെയ്യും. കേരളത്തില്‍ ഒരു യുവതിയുടെ മരണത്തിന് അരളിപ്പൂവ് ഇടയാക്കിയതോടെയാണ് അരളിപ്പൂവ് ചര്‍ച്ചയാകുന്നത്. അടുത്തിടെ അരളിച്ചെടി തിന്ന ഒരു പശുക്കുട്ടിയും നാട്ടില്‍ ചത്തിരുന്നു. കുട്ടികളെയും കൊണ്ട് പാര്‍ക്കിലും പൊതുസ്ഥലങ്ങളിലും പോകുമ്പോള്‍ അവിടെ കാണുന്ന അരളി ചെടിയോട് അകലം പാലിക്കണം.
