നന്തി-ചെങ്ങോട്ടുകാവ് ബൈപ്പാസ് നിര്മ്മാണം വേഗത്തിലാക്കണം; യൂത്ത് കോണ്ഗ്രസ്
കൊയിലാണ്ടി; ദേശീയ പാതയിലെ റോഡ് തകര്ച്ചയ്ക്കും,ഗതാഗത സ്തംഭനത്തിനും പരിഹാരമായി നന്തി-ചെങ്ങോട്ടുകാവ് ബൈപ്പാസിന്റെ നിര്മ്മാണ പ്രവൃത്തി വേഗത്തില് പൂര്ത്തിയാക്കണമെന്ന് യൂത്ത് കോണ്ഗ്രസ് കൊയിലാണ്ടി നിയോജക മണ്ഡലം കമ്മിറ്റി ആവശ്യപ്പെട്ടു.
നന്തി മുതല് ചെങ്ങോട്ടുകാവ് വരെ നിലവിലുളള ദേശീയ പാത ആകെ തകര്ന്നു കിടപ്പാണ്. നിരന്തരം വാഹനമോടുന്ന ഈ റോഡില് വര്ഷങ്ങളായി റീ ടാറിംങ്ങ് പോലും നടത്തിയിട്ടില്ല. കൊല്ലം മുതല് നന്തിവരെ ഹൈവേയില് പൊളിയാന് ഒരിടവുമില്ല. കൊയിലാണ്ടി നഗരത്തില് കുടിവെളള പദ്ധതിയ്ക്കായി റോഡില് കീറിയിട്ട ചാലുകള് ശരിയായി നികത്താനോ,ടാറിംങ്ങ് നടത്താനോ അധികൃതര് തയ്യാറായിട്ടില്ല.രാപകല് കൊയിലാണ്ടി നഗരത്തില് ഗതാഗതം സ്തംഭിച്ചു കിടക്കുകയാണ്. ഗുരുതരാവസ്ഥയിലുളള രോഗികളെയും കൊണ്ടു പോകുന്ന ആബുലന്സുകള്ക്ക് പോലും പോകാന് കഴിയുന്നില്ല. ഈ നരക യാത്രയ്ക്ക് അടിയന്തിരമായ പരിഹാരം വേണമെന്നും. ഈ സാഹചര്യത്തില് നന്തി -ചെങ്ങോട്ടുകാവ് ബൈപ്പാസിന്റെ നിര്മ്മാണ പ്രവൃത്തി വേഗത്തിലാക്കി പാത തുറന്നു കൊടുക്കണം. ബൈപ്പാസിന് വശത്തു കൂടെയുളള സര്വ്വീസ് റോഡിന്റെ പണിയും തീര്ക്കണം. മഴ തുടങ്ങിയതു മുതല് ഹൈവേയുടെ നിര്മ്മാണ പ്രവൃത്തികളെല്ലാം സ്തംഭിച്ചു കിടക്കുകയാണെന്നും യൂത്ത് കോണ്ഗ്രസ് ആരോപിക്കുന്നു.
കുന്ന്യോറമലയിലെ മണ്ണിടിച്ചില് സാധ്യതയുളള സ്ഥലം ഏറ്റെടുക്കുന്ന കാര്യത്തിലും മെല്ലെപ്പോക്ക് നയമാണ് ദേശീയപാതാധികൃതര് അനുവര്ത്തിക്കുന്നത്. സര്വ്വീസ് റോഡിലെ കുഴികള് അടച്ച് ഗതാഗതം സുഗമമാക്കണം. കൊയിലാണ്ടി ഹാര്ബര് – കാപ്പാട് തിരപാതയും അടിയന്തിരമായി ഗതാഗതയോഗ്യമാക്കണം. കടല് ഭിത്തി ശക്തിപ്പെടുത്താന് മേജര് ഇറിഗേഷന് വകുപ്പ് നടപടി എടുക്കണം. ഇക്കാര്യത്തില് അലംഭാവം തുടര്ന്നാല് റോഡ് ഉപരോധം പോലുളള ശക്തമായ സമരത്തിന് യൂത്ത് കോണ്ഗ്രസ് നേതൃത്വം നല്കുമെന്നും ഇവര് പറയുന്നു
യൂത്ത് കോണ്ഗ്രസ്സ് നിയോജക മണ്ഡലം പ്രസിഡന്റ് തന്ഹീര് കൊല്ലം അധ്യക്ഷനായി.എം കെ സായീഷ്, സി.ടി.ജെറില് ബോസ്, റാഷിദ് മുത്താമ്പി, എം.പി. ഷംനാസ്, എം.നിംനാസ്, റംഷീദ് കാപ്പാട്, കെ.വി.നിഖില്, മുഹമ്മദ് നിഹാല്, കെ.ടി. അശ്വിന് എന്നിവര് സംസാരിച്ചു.
